Кавалеўскі назваў падпісанне пагаднення з Еўрапарламентам “моцным крокам” да міжнароднага прызнання дэмсіл

3 траўня, Позірк. Падпісанае 3 траўня пагаднення аб супрацоўніцтве паміж Еўрапейскім парламентам і беларускімі дэмакратычнымі сіламі “пракладвае дарогу да пошуку магчымасцяў заключэння двухбаковых дамоўленасцей з нацыянальнымі парламентамі”, заявіў намеснік кіраўніка Аб’яднанага пераходнага кабінета (АПК), прадстаўнік па замежных справах Валерый Кавалеўскі.

Паводле яго слоў, пагадненне стала “моцным крокам у справе міжнароднага прызнання дэмакратычных сіл Беларусі”.

Ад імя дэмсіл ён выказаў удзячнасць спікеру ЕП Раберце Метсоле “за шчырую і прадметную падтрымку намаганняў беларускага народа па аднаўленні дэмакратыі і абароне незалежнасці Беларусі ад агрэсіўных дзеянняў Расіі”.

Як адзначыў Кавалеўскі, “дамоўленасць адкрывае для дэмакратычных сіл магчымасці весці сістэмную супрацу з Еўрапейскім парламентам па крытычна важных справах”. “Як кіраўнік місіі ў Бруселі, Уладзімір Астапенка ўжо пачаў абмеркаванне з Еўрапарламентам наступных дзеянняў па рэалізацыі дамоўленасцяў”, — дадаў палітык.

“Разлічваю, што Каардынацыйная рада новага складу пасля выбараў 25 траўня далучыцца да ўсталявання парламенцкіх сувязяў, чым да гэтага часу паспяхова займаўся[дарадца Святланы Ціханоўскай па канстытуцыйнай рэформе і парламенцкім супрацоўніцтве] Анатоль Лябедзька”, — падкрэсліў Кавалеўскі.

Цырымонія падпісання пагаднення адбылася 3 траўня на Мальце ў рамках візіту ў гэтую краіну дэмакратычнага лідара Святланы Ціханоўскай. Ад Еўрапарламента подпіс пад дакументам, які афіцыйна называецца “Ліст аб намеры супрацоўніцтва”, паставіла спікер Раберта Метсола — мальтыйскі палітык, якая займае гэтую пасаду са студзеня 2022 года.

У дакуменце адзначаецца, што Аб’яднаны пераходны кабінет і Каардынацыйная рада “павінны разглядацца міжнароднай супольнасцю як прадстаўнікі народа Беларусі”.