BelPol азнаёміў пасла Кізіма са “схемамі ўдзелу” рэжыму Лукашэнкі ў агрэсіі РФ супраць Украіны
22 траўня, Позірк. “Актуальныя пытанні дзейнасці беларускай дэмакратычнай супольнасці” былі абмеркаваныя на сустрэчы прадстаўнікоў аб’яднання былых сілавікоў BelPol з паслом па асаблівых даручэннях па Беларусі МЗС Украіны Ігарам Кізімам.
Як паведаміў BelPol 22 траўня ў сваім тэлеграм-канале, Кізіму была прадастаўленая інфармацыя пра “схемы ўдзелу рэжыму Лукашэнкі ў расійскай агрэсіі супраць Украіны”.
Заяўляецца, што па выніках сустрэчы бакі “падкрэслілі ўпэўненасць у паспяховасці далейшага ўзаемадзеяння на карысць незалежнай Беларусі і свабоднай Украіны”.
19 траўня BelPol апублікаваў на сваім ютуб-канале расследаванне, у якім паведамляецца пра тое, як беларускія кампаніі зарабляюць мільёны долараў на пастаўках у Расію ўзбраенняў у абыход санкцый.
У цэнтры апавядання — дзейнасць ААТ “Пеленг”, якое знаходзіцца пад санкцыямі, аднаго з вядучых прадпрыемстваў у сістэме Дзяржкамваенпрама. На аснове наяўных дакументаў BеlPol сцвярджае, што кампанія актыўна ўдзельнічае ў аснашчэнні расійскай баявой тэхнікі аптычнымі прыцэламі і іншым высокадакладным абсталяваннем. У гэтым ёй дапамагаюць іншыя беларускія прадпрыемствы, а таксама спецыяльна зарэгістраваныя фірмы-пракладкі. Камплектуючыя закупляюцца ў Кітаі, канчатковы прадукт прадаецца ў РФ і паступае на ўзбраенне расійскай арміі.
21 ліпеня 2022 года ў інтэрв’ю французскаму інфармацыйнаму агенцтву “Франс Прэс” Аляксандр Лукашэнка паведаміў, што з Беларусі ва Украіну была ўведзеная 20-тысячная групоўка расійскіх войскаў. Пасля паўночныя тэрыторыі былі вызваленыя.
Кізім быў паслом Украіны ў Беларусі з 20 лютага 2017 па 22 чэрвеня 2023 года. У лютым гэтага года прызначаны паслом па асаблівых даручэннях.
Ігар Кізім: Для Украіны вельмі важна, што беларускія дэмсілы не падтрымліваюць вайну
Ва Украіне разумеюць, што нельга ставіць знак роўнасці паміж рэжымам Аляксандра Лукашэнкі, які падтрымлівае расійскую агрэсію, і беларускім народам, які агулам займае антываенную пазіцыю, заявіў у інтэрв'ю "Позірку" амбасадар па асаблівых даручэннях МЗС Украіны па Беларусі Ігар Кізім. Размова адбылася …
