Лукашэнка і Пуцін абмяркуюць у Мінску “ўвесь комплекс беларуска-расійскіх адносін”

23 траўня, Позірк. Аляксандр Лукашэнка і прэзідэнт Расіі Уладзімір Пуцін абмяркуюць у Мінску “стан і перспектывы развіцця ўсяго комплексу беларуска-расійскіх адносін”, перамовы пройдуць 24 траўня ў Палацы незалежнасці.

Як паведамляе прэс-служба Лукашэнкі, Пуцін прыбудзе ў Беларусь 23 траўня з двухдзённым візітам.

Сцвярджаецца, што тэмамі перамоў стануць “пытанні інтэграцыі ў святле рэалізацыі рашэнняў Вышэйшага дзяржсавета Саюзнай дзяржавы, палітычны дыялог, прасоўванне сумесных гандлёва-эканамічных і кааперацыйных праектаў, умацаванне бяспекі, а таксама ўзаемадзеянне ў гуманітарнай сферы”.

“У цэнтры ўвагі традыцыйна будуць таксама міжнародны парадак дня, становішча ў рэгіёне, сумеснае рэагаванне на выклікі і пагрозы, якія ўзнікаюць”, — гаворыцца ў паведамленні.

У папярэдні раз Лукашэнка сустракаўся з Пуціным падчас свайго візіту ў Маскву 8–9 траўня на саміт ЕАЭС і парад да Дня Перамогі.

Тады беларускі візіцёр заявіў, што Беларусь і Расія дамовіліся сумесна праводзіць ядзерныя вучэнні.

Намеснік кіраўніка Аб’яднанага пераходнага кабінета, кіраўнік Народнага антыкрызіснага ўпраўлення Павел Латушка выказаў меркаванне, што вучэнні з’яўляюцца інфармацыйна-псіхалагічнай аперацыяй Крамля, закліканай сарваць чэрвеньскую канферэнцыю ў Швейцарыі аб міры ва Украіне.

Беларускі дэмакратычны лідар Святлана Ціханоўская заявіла, што размяшчэнне расійскай ядзернай зброі ў Беларусі і правядзенне ядзерных вучэнняў уяўляе “прамую і сур’ёзную пагрозу бяспецы Еўропы”. На яе думку, “гэта правакацыі Пуціна і Лукашэнкі”, накіраваныя “на шантаж і запалохванне Еўропы ў спробе раскалоць Захад і аслабіць падтрымку Украіны”.