46 грамадзян Беларусі пазбаўленыя ў Літве права на захоўванне зброі
26 траўня, Позірк. 46 грамадзян Беларусі і 294 грамадзяніна Расіі, якія пастаянна пражываюць у Літве, пазбаўленыя ў гэтай краіне права на захоўванне або нашэнне зброі, паведамляе інфармагенцтва BNS.
“Засталося два чалавекі, зброя якіх дагэтуль не знойдзеная. З гэтымі асобамі звязаліся, але цяпер яны не знаходзяцца ў Літве. Калі яны вернуцца ў Літву, зброю забяруць”, — цытуе партал lrt.lt паведамленне МУС Літвы.
Удакладняецца, што ў пачатку года ўсе асобы, якія валодалі зброяй, былі пісьмова апавешчаныя аб неабходнасці да 1 красавіка “добраахвотна прадаць зброю або здаць яе паліцыі”.
“Большасць асоб скарысталіся гэтай магчымасцю, а астатнюю зброю паліцыя канфіскавала пасля 1 красавіка”, — гаворыцца ў публікацыі.
22 снежня 2022 года Сейм Літвы канчаткова зацвердзіў папраўкі да закона аб кантролі над зброяй і боепрыпасамі. За змены выступілі 112 дэпутатаў, устрымаліся — 13, супраць — 1.
Папраўкі ўступілі ў сілу 1 красавіка 2023 года, сярод іншага яны забараняюць грамадзянам Беларусі і Расіі, якія пастаянна пражываюць у Літве, набываць і захоўваць зброю, зброевыя прыналежнасці, боепрыпасы і іх часткі.
Пасля пачатку дзеяння абноўленага закона тыя беларускія і расійскія грамадзяне, у каго ўжо ёсць зброя, павінны былі на працягу года адмовіцца ад яе — прадаць, перарабіць у небаявую або здаць у паліцыю. У адваротным выпадку зброя падлягае канфіскацыі.
Раней паведамлялася, што ў Літве зброяй валодае 42 грамадзяніна Беларусі і 294 грамадзяніна Расіі.
1 снежня 2022 года падобная забарона пачала дзейнічаць у Эстоніі.
