27 траўня, Позірк. За мінулыя суткі ў Беларусі патанула чатыры чалавекі, паведамляе Беларускае рэспубліканскае таварыства ратавання на водах (АСВОД).
Ад пачатку траўня ў вадаёмах Беларусі патанула 27 чалавек, вынікае з праведзенага “Позіркам” аналізу статыстыкі АСВОД.
Паводле даных арганізацыі, у 2023 годзе ў Беларусі патанула 339 чалавек — на 12,2% менш, чым у 2022-м. Непаўналетніх загінула на вадзе 21 — годам раней 25 (-16%).
Паведамлялася, што 55,2% загінулых (187 чалавек, у тым ліку два падлеткі) знаходзілася ў стане алкагольнага ці наркатычнага ап’янення.
МНС папярэджвае, што купанне дазволена толькі на адмыслова абсталяваных пляжах; вельмі небяспечна плаваць і ныраць у незнаёмых для адпачынку месцах. Не рэкамендуецца купацца пасля ўжывання спіртнога.
У ваду лепш заходзіць паступова, каб даць целу абвыкнуць да перападу тэмператур і пазбегнуць спазму крывяносных сасудаў.
Варта патлумачыць дзецям, як трэба сябе паводзіць у вадаёме, адзначае МНС. Дзяцей нельга выпускаць з-пад увагі, калі яны знаходзяцца ў вадзе.
