Алейнік заклікаў пачаць кансультацыі па новай стратэгіі развіцця АДКБ

21 чэрвеня, Позірк. Да “прадметных кансультацый” па пытанні новай стратэгіі развіцця Арганізацыі Дагавора аб калектыўнай бяспецы (АДКБ) заклікаў кіраўнік МЗС Беларусі Сяргей Алейнік 21 чэрвеня ў Алматы на пасяджэнні Савета міністраў замежных спраў АДКБ.

Паводле слоў чыноўніка, якія прыводзіць прэс-служба знешнепалітычнага ведамства, дзейная стратэгія, прынятая ў 2016 годзе, разлічана да 2025-га.

Алейнік у чарговы раз заявіў пра крызіс міжнародных стасункаў і “трансфармацыю сусветнага геапалітычнага ландшафту”, “хваравітую ломку існага светапарадку” і неабходнасць змяніць “еўрапейскую мадэль” на “еўразійскую архітэктуру” бяспекі “з новым пакаленнем арганізацый”.

На яго думку, прыпыненне краінамі НАТО дзеяння Дагавора аб звычайных узброеных сілах у Еўропе (ДЗУСЕ) “развязвае ім рукі для нарошчвання беспрэцэдэнтных ваенных патэнцыялаў”, з-за чаго “Беларусь не магла не зарбіць захады ў адказ люстранога характару”. Пры гэтым, адзначыў міністр, Мінск заявіў пра гатоўнасць “аднавіць выкананне ДЗУСЕ пры ўмове вяртання краін — членаў НАТО да яго выканання”, “хоць ілюзій на гэты конт” у краіне “не маюць”.

Запрасіўшы сваіх калег па АДКБ на “далейшыя прадметныя дыскусіі па тэматыцы еўразійскай бяспекі”, Алейнік назваў дакладныя тэрміны правядзення ў Мінску другой міжнароднай канферэнцыі па гэтым пытанні — 31 кастрычніка — 1 лістапада 2024 года.

АДКБ — ваенна-палітычны блок, мэтамі якога заяўленыя “ўмацаванне міру, міжнароднай і рэгіянальнай бяспекі і стабільнасці, абарона на калектыўнай аснове незалежнасці, тэрытарыяльнай цэласнасці і суверэнітэту дзяржаў-членаў”. У яго ўваходзяць Арменія, Беларусь, Казахстан, Кыргызстан, Расія і Таджыкістан.

19 чэрвеня стала вядома, што пасяджэнне Савета міністраў замежных спраў АДКБ пройдзе без Арменіі. Ад візіту ў Алматы адмовіўся кіраўнік МЗС гэтай дзяржавы Арарат Мірзаян, які 20 чэрвеня здзейсніў візіт у Літву.

2 чэрвеня, выступаючы перад парламентам, прэм’ер-міністр Нікол Пашынян заявіў пра магчымы выхад Арменіі з АДКБ. Паводле яго слоў, тэрміны выхаду яшчэ не вызначаныя.

Падчас выступу палітык абвінаваціў блок у тым, што яго асобныя краіны з Азербайджанам “планавалі вайну” супраць Арменіі.

У адказ на гэта адзін з апазіцыйных дэпутатаў зрабіў заўвагу: “Выйдзіце тады з гэтага саюза”. “Мы выйдзем, вы мяне гэтым пужаеце? У нас усё добра, мы вырашым, калі пойдзем. Як вы думаеце, які наступны крок, ці можам мы вярнуцца назад? Не хвалюйцеся”, — адказаў Пашынян.

Пазней Мірзаян, каментуючы выказванні кіраўніка ўрада, назваў памылковым сцвярджэнне, што краіна выходзіць з АДКБ. “Прэм’ер-міністр заявіў, што мы вырашым, калі выйдзем, але назад не вернемся. Калі нехта сцвярджае, што прэм’ер-міністр Арменіі заявіў, што Арменія выходзіць з АДКБ, то памыляецца”, — сказаў чыноўнік.