Украіна лічыць раптоўную праверку беларускай арміі спробай “разыграць карту пагрозы”
21 чэрвеня, Позірк. Раптоўную праверку беларускай арміі Кіеў назваў актывізацыяй інфармацыйнай кампаніі па нагнятанні напружанасці на мяжы, вынікае з заявы Цэнтра супрацьдзеяння дэзінфармацыі (ЦСД) пры Радзе нацыянальнай бяспекі і абароны Украіны.
“Сёння Мінабароны Беларусі абвясціла пра раптоўную праверку гатоўнасці войскаў. Незадоўга да гэтага расійскія тэлеграм-каналы актыўна распаўсюджвалі паведамленні ад беларускіх пагранічнікаў пра нібыта сцягванне Украінай вайсковай тэхнікі і асабовага складу да мяжы. Такім чынам вораг спрабуе ў чарговы раз разыграць карту “пагрозы з Беларусі”, — лічыць ЦСД.
Ведамства канстатавала, што гэтая пагроза сёння “з’яўляецца больш інфармацыйнай, чым ваеннай”.
“Актыўнасць войскаў у Беларусі старанна адсочваецца нашай выведкай, — гаворыцца ў заяве. — На мяжы захоўваецца пагроза ДВГ (дыверсійна-выведвальных груп. — “Позірк”.), Аднак у ворага цяпер няма рэсурсаў на гэтым кірунку для новага наступу на Украіну. У той жа час украінскія сілы абароны гатовыя да любых правакацый з беларускай тэрыторыі”.
“Імітуючы пагрозу з боку Беларусі, вораг спрабуе выклікаць паніку і дэстабілізаваць сітуацыю ва ўкраінскім грамадстве. Таксама праціўнік мае на мэце адцягнуць украінскія сілы з іншых участкаў фронту”, — падкрэсліў цэнтр.
Кіраўнік ЦСД Андрэй Каваленка адзначыў, што пакуль на мяжы з Беларуссю “няма сур’ёзных пагроз”. “Расійскі асабовы склад у Беларусі выконвае ролю ДВГ. І ў выпадку заходу гэтых ДВГ на нашу тэрыторыю, іх, вядома ж, будуць знішчаць”, — сказаў ён.
Праверка беларускіх войскаў пачалася 21 чэрвеня ў 9:00, манеўры пройдуць на палігонах і ўчастках мясцовасці ў Брэсцкай і Гомельскай абласцях.
Напярэдадні Дзяржпагранкамітэт заявіў, што Украіна канцэнтруе цяжкае ўзбраенне на мяжы з Беларуссю.
Рэжым Аляксандра Лукашэнкі няспынна праводзіць вучэнні, трэніроўкі, зборы на фоне абвастрэння стасункаў з Захадам і вайны Расіі супраць Украіны, у якой афіцыйны Мінск падтрымлівае Крэмль.
Улады зладзілі праверку войскаў для ацэнкі іх дзеянняў у “хутказменлівай абстаноўцы”
21 чэрвеня, Позірк. Па выніках раптоўнай праверкі вайсковае кіраўніцтва Беларусі хоча атрымаць "аб'ектыўную ацэнку гатоўнасці вайсковых часцей і падраздзяленняў выконваць задачы ва ўмовах хутказменлівай абстаноўкі", заявіў начальнік Генеральнага штаба — першы намеснік міністра абароны Павел Муравейка. "Праверка носіць комплексны характар і прадугледжвае …
