Лукашэнка накіраваў спачуванні Пуціну ў сувязі з серыяй тэрактаў у Дагестане — шостым сярод кіраўнікоў краін СНД

24 чэрвеня, Позірк. Аляксандр Лукашэнка “ад імя беларускага народа і сябе асабіста” выказаў “самыя шчырыя спачуванні прэзідэнту Расіі Уладзіміру Пуціну ў сувязі з серыяй варварскіх тэрактаў у Дагестане, ахвярамі якіх сталі вартавыя правапарадку і мірныя жыхары”, зазначаецца ў тэлеграм-канале “Пул первого”.

“Рашуча асуджаем бесчалавечныя напады на рэлігійныя аб’екты, мэтай якіх было запалохаць людзей, пасеяць паніку і недавер адзін да аднаго, парушыць міжканфесійны мір і згоду, якія існавалі стагоддзямі ў дружалюбным Дагестане”, — заявіў Лукашэнка.

Ён “выказаў перакананне, што ўсе вінаватыя ў здзяйсненні гэтага цяжкага злачынства будуць устаноўлены і панясуць заслужанае пакаранне”.

Паведамленне аб спачуванні з’явілася ў 13:26 — амаль праз 20 гадзін пасля здарэння.

Раніцай 24 чэрвеня Лукашэнка ў Менску прымаў губернатара Ленінградскай вобласці Аляксандра Драздзенку, аднак тэма тэрактаў не ўзнімалася, вынікае з матэрыялаў прэс-службы Лукашэнкі.

Паводле інфармацыі расійскіх СМІ, раней за яго спачуванні Пуціну накіравалі прэзідэнты Азербайджана, Казахстана, Кыргызстана і Узбекістана, а таксама прэм’ер-міністр Арменіі.

23 чэрвеня тэракты адбыліся ў двух расійскіх гарадах у Дагестане — Дэрбэнце і Махачкале. Баевікі напалі на сінагогу і царкву, пасля чаго атакавалі паліцыянтаў. Паводле звестак СМІ, колькасць загінуўшых на гэты момант складае 20 чалавек, сама меней 15 з іх — паліцэйскія.

Быў уведзены рэжым контртэрарыстычнай аперацыі.