Лукашэнка дазволіў Кітаю “выкарыстоўваць Беларусь у прасоўванні сваіх інтарэсаў у Еўропу”
25 чэрвеня, Позірк. Кітай не можа існаваць без Еўропы, заявіў Аляксандр Лукашэнка 25 чэрвеня ў Мінску на сустрэчы з сакратаром партыйнага камітэта Пекінскага ўніверсітэта Хаа Пінам і прадстаўнікамі кітайскіх ВНУ.
“Мы дамовіліся са [старшынёй КНР] спадаром Сі Цзіньпінам, што калі Кітаю трэба, выкарыстоўвайце Беларусь у прасоўванні сваіх інтарэсаў у Еўропу, — цытуе Лукашэнку яго прэс-служба. — Кітай — гіганцкая краіна, вызначае надвор’е ў свеце. Таму яна павінна супрацоўнічаць з асноўнымі цэнтрамі апоры нашай планеты — ЗША, Еўрасаюзам, Расіяй, Індыяй, іншымі краінамі”.
Пры гэтым ён не згадаў, што Беларусь знаходзіцца пад санкцыямі Еўрасаюза, у тым ліку эканамічнымі.
Прэзідэнт Польшчы Анджэй Дуда на перамовах з Сі Цзіньпінам 24 чэрвеня ў Пекіне закрануў пытанні, звязаныя з “ціскам, гібрыднай атакай”, якую “беларускія ўлады праводзяць на польскай мяжы з 2021 года”. Па выніках сустрэчы палітык сказаў журналістам, што “падрабязна абмеркаваў сітуацыю” з кітайскім лідарам, паведаміў аб праблемах трансгранічнага руху, якія ўзніклі праз “негатыўнае стаўленне беларускіх уладаў”.
Усё больш агрэсіўныя дзеянні супраць Польшчы, адзначыў ён, выклікаюць “ўзмацненне жорсткасці пазіцыі грамадства па пытаннях, звязаных з мяжой, а таксама яе перасячэннем”. “Відавочна, гэта мае свае наступствы і ў тым, што ўвогуле тычыцца магчымасці рэалізацыі прыгранічнага руху. Я прадставіў прэзідэнту вельмі негатыўнае стаўленне [грамадства] да таго, што рэалізуюць беларускія ўлады ў гэтым аспекце”, — заявіў Дуда.
Пра намер абмеркаваць з Сі Цзіньпінам наступствы міграцыйнага крызісу на польска-беларускай мяжы Дуда заяўляў 22 чэрвеня, перад вылетам у Кітай. Ён увязаў гэтую праблему з эканомікай, патлумачыўшы, што праз сітуацыю на мяжы сутыкаецца з абмежаваннямі адзін з чыгуначных маршрутаў дастаўкі кітайскіх тавараў у Еўропу — той, які праходзіць праз Беларусь.
Міграцыйны крызіс, які цягнецца з вясны 2021 года, Варшава, Рыга і Вільнюс называюць “гібрыднай атакай”, арганізаванай рэжымамі ў Мінску і Маскве.
Ад пачатку 2024 года суседнія краіны Еўрасаюза спынілі 22,5 тыс. спробаў нелегальнага перасячэння мяжы мігрантамі з боку Беларусі, у тым ліку Польшча — 19,8 тыс.
13 чэрвеня на польска-беларускай мяжы распачала дзеянне буферная зона. Паводле інфармацыі МУС Польшчы, дзякуючы ёй колькасць спробаў парушэння мяжы скарацілася прыкладна на траціну.
