Канада і ЕС заклікалі РФ і Беларусь неадкладна забяспечыць вяртанне незаконна перамешчаных украінскіх дзяцей

12 лістапада, Позірк. Неадкладна забяспечыць бяспечнае вяртанне ўсіх незаконна дэпартаваных і перамешчаных украінскіх дзяцей заклікалі Расею і Беларусь у сумеснай дэкларацыі Канада і Еўрапейскі саюз, гаворыцца ў паведамленні кандскага МЗС.

Дакумент быў прыняты 11 лістапада па выніках чацвёртага пасяджэння сумеснага міністэрскага камітэта Канада — Еўрапейскі саюз з удзелам міністра замежных спраў Канады Аніты Ананд і кіраўніка еўрапейскай дыпламатыі Каі Калас.

Бакі заявілі, што “па-ранейшаму адданыя падтрымцы Міжнароднай кааліцыі па вяртанні ўкраінскіх дзяцей, сустаршынямі якой з’яўляюцца Украіна і Канада”.

“Канада і ЕС таксама рашуча асуджаюць падтрымку беларускага рэжыму і іншых краін, якія садзейнічаюць агрэсіі супраць Украіны“, — адзначаецца ў заяве.

У верасні 2024 года кіраўнік Народнага антыкрызіснага ўпраўлення (НАУ) Павел Латушка паведамляў, што, паводле звестак НАУ, на тэрыторыю Беларусі было дэпартавана звыш 3,5 тыс. украінскіх дзяцей з больш чым 20 населеных пунктаў, якія знаходзяцца на акупаваных РФ тэрыторыях Украіны.