Найвыгаднейшыя ўмовы бяспошліннага ўвозу кітайскіх свечак запальвання ў Беларусі створаныя для прадпрыемстваў Мінпрама
25 ліпеня, Позірк. Сярод суб’ектаў эканомікі Беларусі найвыгаднейшыя ўмовы па бяспошлінным увозе іскравых свечак запальвання, вырабленых у Кітаі, створаныя для прадпрыемстваў Міністэрства прамысловасці сведчыць праведзены “Позіркам” аналіз актаў нацыянальнага і наднацыянальнага заканадаўства.
У красавіку 2026 года калегія Еўразійскай эканамічнай камісіі (ЕЭК) прыняла рашэнне № 46, у адпаведнасці з якім на свечкі запальвання з КНР, якія ўвозяцца на тэрыторыю Еўразійскага эканамічнага саюза, была ўсталяваная антыдэмпінгавая пошліна — 17,23% мытнага кошту.
Пры гэтым калегія ЕЭК вызначыла для ўсіх членаў аб’яднання, акрамя Расіі, штогадовы аб’ём гэтай прадукцыі, які не абкладаецца пошлінай. Ліміт для Беларусі — 1,8 млн адзінак (для Казахстана — 6 млн, Арменіі і Кыргызстана — па 0,5 млн).
24 ліпеня Савет міністраў Беларусі прыняў пастанову № 372 “Аб увозе свечак запальвання”, у якой вызначаны механізм размеркавання гэтай квоты паміж суб’ектамі эканомікі краіны на 2026–2031 гады.
Згодна з дакументам, апублікаваным 25 ліпеня на Нацыянальным прававым інтэрнэт-партале, вытворцы легкавых аўтамабіляў — гаспадарчыя таварыствы, чые акцыі або долі ў статутных фондах належаць Рэспубліцы Беларусь і перададзеныя ва ўпраўленне Міністэрству прамысловасці, атрымліваюць права на бяспошлінны ўвоз не менш за 120 тыс. свечак на год (не менш за 6,67% квоты).
Прадпрыемствы, аб’яднанні і арганізацыі, якія ўваходзяць у склад канцэрна “Белнафтахім”, — не менш за 1,5 тыс. адзінак (не менш за 0,08%).
Астатні аб’ём будзе размяркоўвацца “на падставе заяў удзельнікаў знешнегандлёвай дзейнасці ў парадку чарговасці паступлення такіх заяў у Міністэрства антыманапольнага рэгулявання і гандлю”, якое будзе выдаваць разавыя ліцэнзіі на ўвоз.
Пры гэтым гранічны аб’ём свечак, які ліцэнзіяты могуць увозіць, залежыць ад маштабу іх ранейшай дзейнасці. Калі на працягу 3 гадоў да года, на які размяркоўваецца квота, суб’ект увёз у краіну не менш за тысячу свечак, то яму можа быць дазволена завезці без выплаты пошліны не больш за 10 тыс. адзінак разава; увёз менш за тысячу — дазволена не больш за 1 тыс. на працягу каляндарнага года; не ўвозіў — не больш за 100 штук на працягу каляндарнага года.
Пастанова набудзе моц на пачатку жніўня і будзе дзейнічаць да 9 траўня 2031 года.
