Кіроўца фуры загінуў у Бярозаўскім раёне — лопнула кола, з’ехаў у кювет
24 ліпеня, Позірк. Пра смяротнае дарожна-транспартнае здарэнне ў Бярозаўскім раёне паведамляе УУС Брэсцкага аблвыканкама.
ДТЗ здарылася 24 ліпеня каля 13:50. Адзначаецца, што 50-гадовы кіроўца кіраваў грузавым аўтамабілем “Сканія” і рухаўся па аўтадарозе М1/Е30 Брэст — Мінск — мяжа РФ. Паводле папярэдняй інфармацыі, на 117-м кіламетры аўтадарогі ў фуры “лопнула кола (пярэдняе левае), у выніку чаго аўтамабіль выехаў на паласу сустрэчнага руху, здзейсніў з’езд у левы па ходзе руху кювет і перакуліўся”.
У выніку ДТЗ кіроўца загінуў.
“Следствам будзе дадзеная прававая ацэнка”, – гаворыцца ў паведамленні.
Колькасць загінулых у ДТЗ на тэрыторыі Беларусі за год зменшылася на 1,8% (з 434 у 2024-м да 426 у 2025-м), вынікае з праведзенага “Позіркам” аналізу звестак Нацыянальнага статыстычнага камітэта.
Пры гэтым пазітыўная дынаміка (зніжэнне смяротнасці) адзначана толькі ў Магілёўскай вобласці — у 1,8 раза (з 54 да 30).
Сітуацыя не змянілася ў Мінскай вобласці — 115 загінулых, Брэсцкай — 76, Гомельскай — 66.
Найгоршая дынаміка зафіксаваная ў Мінску — рост у 1,7 раза (з 14 да 24). Далей: Віцебская — на 6,2% (з 65 да 69), Гродзенская — на 4,5% (з 44 да 46).
Гл. таксама:
