Беларусь на трэцім месцы ў ЕАЭС па пакрыцці знешняга доўгу міжнароднымі рэзервамі

24 ліпеня, Позірк. Знешні доўг у Еўразійскім эканамічным саюзе “на сумарнай аснове” павялічыўся за год на 2 млрд 924,9 млн долараў (+0,5%), паведамляе Еўразійская эканамічная камісія (ЕЭК).

На 1 красавіка 2026 года агульная запазычанасць склала 552 млрд 560,5 млн долараў (на аналагічную дату 2025-га — 549 млрд 635,6 млн):

Арменія — 19 млрд 978,7 млн (17 млрд 70,8 млн; +17%);

Беларусь — 38 млрд 295,6 млн (37 млрд 212,6 млн; +2,9%);

Казахстан — 182 млрд 778,2 млн (170 млрд 37,8 млн; +7,5%);

Кыргызстан — 12 млрд 444,2 млн (12 млрд 269,2 млн; +1,4%);

Расія — 299 млрд 63,7 млн (313 млрд 45,3 млн; -4,5%).

“Ва ўсіх дзяржавах — членах ЕАЭС доўгатэрміновы знешні доўг пераважае — яго доля знаходзіцца ў межах паміж 55 і 88%”, — адзначае ЕЭК.

Структура знешняга доўгу адрознівалася па дзяржавах — членах ЕАЭС. Па стане на 1 красавіка ў Арменіі, Беларусі і Кыргызстане пераважаў доўг органаў дзяржаўнага кіравання, у Казахстане — доўг па міжфірменным крэдытаванні (прамых інвестыцыях), у Расіі — доўг іншых сектараў.

Высокае пакрыццё знешняга доўгу міжнароднымі рэзервамі забяспечана толькі ў Расіі (250,4%). У іншых краінах гэты паказчык быў такім: у Арменіі — 27,7%, Казахстане — 36,5%, Беларусі — 39,8%, Кыргызстане — 69,2%.

Валавы знешні доўг — нявыплачаная сума абавязацельстваў перад нерэзідэнтамі, якая патрабуе выплаты асноўнага доўгу і (або) працэнтаў.

У адрозненне ад знешняга дзярждоўгу, які ўлічвае толькі абавязацельствы ўрада перад нерэзідэнтамі, валавы знешні доўг ахоплівае абавязацельствы ўсіх рэзідэнтаў, падзеленых на чатыры сектары эканомікі: органы дзяржкіравання, органы грашова-крэдытнага рэгулявання, банкі (дэпазітныя арганізацыі, за выключэннем Нацбанка), іншыя юрыдычныя і фізічныя асобы.

Міжнародныя рэзервовыя актывы Беларусі на 1 ліпеня 2026 года склалі 14 млрд 155,8 млн долараў у эквіваленце, сведчаць папярэднія звесткі Нацыянальнага банка.

За месяц золатавалютныя рэзервы знізіліся на 881,8 млн долараў, або на 5,86% (на 1 чэрвеня — 15 млрд 37,6 млн; зніжэнне назіраецца другі месяц запар).

На 1 студзеня 2026 года ЗВР складалі 14 млрд 423 млн долараў. Такім чынам, за першае паўгоддзе яны знізіліся на 267,2 млн, або на 1,85%.