Рыжанкоў запрасіў кіраўніка МЗС Кітая ў Беларусь, абмеркаваў з калегам з Індыі вайскова-тэхнічнае ўзаемадзеянне

23 ліпеня, Позірк. Наведаць Беларусь з афіцыйным візітам прапанаваў міністру замежных спраў Кітая Ван І кіраўнік беларускага знешнепалітычнага ведамства Максім Рыжанкоў 23 ліпеня ў Бішкеку (Кыргызстан) на палях пасяджэння Савета кіраўнікоў МЗС краін Шанхайскай арганізацыі супрацоўніцтва.

Прэс-служба Міністэрства замежных спраў Беларусі паведамляе, што “запрашэнне было з удзячнасцю прынятае”.

Адзначаецца, што перамовы “пацвердзілі поўнае супадзенне падыходаў Беларусі і Кітая па ўсіх пытаннях глабальнага парадку дня”. Рыжанкоў, як заяўляецца, “падкрэсліў нязменную прыхільнасць беларускага боку ўсепагоднаму і ўсёабдымнаму стратэгічнаму партнёрству з Кітаем”.

“Бакі пацвердзілі нязменную ўзаемную падтрымку дзяржаўнага суверэнітэту, тэрытарыяльнай цэласнасці і карэнных інтарэсаў, а таксама дамовіліся актыўна супрацоўнічаць у рамках рэалізацыі кітайскіх глабальных ініцыятыў, — гаворыцца ў паведамленні. — Зверылі падыходы да арганізацыі будучых кантактаў на найвышэйшым і высокім узроўнях, абмеркавалі далейшае падвышэнне ўзроўню міждзяржаўных стасункаў і перспектывы сумеснай працы ў рамках ШАС”.

Суразмоўцы таксама “далі станоўчую ацэнку” цяперашняй дынаміцы двухбаковай гандлёва-эканамічнай і інвестыцыйнай супрацоўніцы, “важным індыкатарам якой служыць павелічэнне беларуска-кітайскага тавараабароту амаль на 30%”.

Міністры, сярод іншага, “закранулі практычныя пытанні пашырэння і ўдасканалення дыпламатычнай прысутнасці Беларусі ў Кітаі” і падпісалі план кансультацый паміж міністэрствамі на 2026–2027 гады, “закліканы надаць узаемадзеянню больш сістэмны і ўзважаны характар”.

У Бішкеку Рыжанкоў таксама сустрэўся з кіраўніком МЗС Індыі Кірці Вардханам Сінгхам. “Асаблівая ўвага” на перамовах была нададзеная падрыхтоўцы да ўдзелу Мінска ў саміце БРІКС, які пройдзе ў верасні ў Нью-Дэлі, а таксама “арганізацыі кантактаў на найвышэйшым і высокім узроўнях”.

“Вызначылі перспектыўныя кірункі развіцця ўзаемнага гандлю па канкрэтных таварных групах. Падкрэслілі абнадзейлівую дынаміку двухбаковага тавараабароту, — гаворыцца ў паведамленні. — Абмеркавалі падрыхтоўку да падпісання каля дзесяці двухбаковых дакументаў, цэнтральным з якіх стане дарожная карта развіцця супрацы на найбліжэйшыя пяць гадоў”.

“[Суразмоўцы] дасягнулі дамоўленасці аб правядзенні ў найбліжэйшыя месяцы пасяджэнняў міжурадавай камісіі па гандлёва-эканамічнай супрацы і аналагічнага механізму па вайскова-тэхнічным узаемадзеянні, а таксама ў частцы ажыццяўлення міжпарламенцкіх кантактаў”, — адзначыла прэс-служба МЗС.

Бакі пацвердзілі “агульнасць пазіцый па ключавых тэмах глабальнага парадку дня, прыхільнасць прынцыпам стабільнасці, устойлівага развіцця і раўнапраўнай міжнароднай супрацы”, а таксама абмеркавалі “пытанні ўзаемадзеяння ў міжнародных арганізацыях, уключаючы ўзаемную падтрымку ініцыятыў, а таксама кандыдатур адзін аднаго ў выбарныя органы сістэмы ААН”.

“У частцы гуманітарнай супрацы з задавальненнем адзначылі істотнае павелічэнне колькасці індыйскіх студэнтаў, якія навучаюцца ў беларускіх навучальных установах, а таксама беларусаў, якія наведваюць Індыю з турыстычнай і аздараўленчай мэтай”, — гаворыцца ў паведамленні.