Тэракт у Польшчы рыхтуе “прыхільнік псеўдахрысціянскіх каштоўнасцяў” — МЗС

24 ліпеня, Позірк. Улады Польшчы з “належнай увагай” паставіліся да атрыманай з Мінска інфармацыі аб падрыхтоўцы на тэрыторыі краіны тэракту, заявіў 24 ліпеня прэс-сакратар Міністэрства замежных спраў Руслан Варанкоў.

“Не сумняваемся, што кампетэнтныя органы Польшчы неадкладна прымуць вычарпальныя меры па прадухіленні трагедыі. Мы гатовыя аказаць неабходную дапамогу. Падкрэсліваем, што пытанні супрацоўніцтва ў сферы барацьбы з тэрорам павінны быць цалкам ачышчаныя ад палітызацыі“, — сказаў Варанкоў (каментарый апублікаваны ў тэлеграм-канале ведамства).

Паводле яго слоў, нягледзячы на “адрозненне ў поглядах” Мінска і Варшавы “па шэрагу пытанняў”, Беларусь “нязменна прытрымліваецца непарушнага прынцыпу добрасуседства”.

У Мінску, дадаў прадстаўнік МЗС, “выдатна разумеюць, што ў выпадку рэалізацыі такога сцэнарыя Захад і так званыя збеглыя супольнасці прадказальна абвінавацілі б беларускія ўлады”.

Варанкоў заявіў, што “радыкалізацыя асоб, якія пакінулі Беларусь і сутыкнуліся з праблемамі за мяжой, у тым ліку праблемамі легалізацыі, — гэта не адзінкавы выпадак, а пэўная тэндэнцыя”.

“Хаваючы на сваёй тэрыторыі дэструктыўныя элементы, Варшава сутыкаецца з непазбежнымі наступствамі — ростам пагроз унутры, калі радыкалы пачынаюць прадстаўляць прамую небяспеку ўжо для жыхароў самой Польшчы”, — сцвярджае чыноўнік.

Польскаму боку, адзначыў ён, былі прадастаўленыя звесткі ў дачыненні да “канкрэтнай асобы“, якая “з’яўляецца прыхільнікам псеўдахрысціянскіх каштоўнасцяў”.

“Наяўнасць у яго матываў і сувязяў, а таксама здзяйсненне ім радыкальных дзеянняў на тэрыторыі Беларусі, кажуць пра гранічную сур’ёзнасць сітуацыі і паказваюць на рэальную пагрозу, — сказаў Варанкоў. — Паводле наяўных даных, жанчына, чые непаўналетнія дзеці павінны былі стаць галоўнай мэтай плануемага злачынства, узначальвае адно з фарміраванняў, прызнаных на тэрыторыі Беларусі экстрэмісцкімі. Дадзены факт наглядна сведчыць аб глыбокім крызісе і нездаровай канкурэнцыі ўнутры асяроддзя так званай палітэміграцыі, якое штучна падтрымліваецца Еўропай”.

Паводле слоў прэс-сакратара МЗС, “спроба падрыхтоўкі тэракту“ з’яўляецца “прадказальнай рэакцыяй ўнутры збеглай супольнасці на папулісцкую і нацэленую на самаабарону дзейнасць замежных палітызаваных цэнтраў, якія фактычна ставяць пад удар ужо і бяспеку грамадзян еўрапейскіх дзяржаў“.

23 ліпеня паведамлялася, што Беларусь праінфармавала Польшчу аб падрыхтоўцы на тэрыторыі гэтай краіны тэракту. Увечары беларускае Міністэрства замежных спраў заявіла, што часоваму паверанаму ў справах Польшчы Кшыштафу Ажане перададзеная інфармацыя, якая паступіла ў ведамства “па лініі праваахоўных органаў Рэспублікі Беларусь адносна падрыхтоўкі тэрарыстычнага акту“.

Сцвярджалася, што тэракт рыхтуецца “асобай, якая знаходзіцца ў Польшчы, асуджанай у <…> Беларусі паводле цэлага шэрагу артыкулаў Крымінальнага кодэкса, якая была нядаўна пазбаўленая польскімі ўладамі дадатковай абароны і права пражывання ў краіне“.

Мэтай тэракту, як заяўлялася, “павінны стаць непаўналетнія дзеці актывісткі, якая пражывае ў Польшчы і мае беларускае грамадзянства, з меркаванняў помсты за недастатковыя намаганні па захаванні за згаданай асобай названага вышэй статусу ў Польшчы“.

Да польскага дыпламата “было таксама даведзена, што дадатковыя звесткі па гэтым пытанні пры неабходнасці і па меры паступлення будуць перададзеныя па каналах узаемадзеяння паміж адпаведнымі кампетэнтнымі органамі дзвюх краін”.

Пазней паведамлялася, што польскія спецыяльныя службы не каментуюць інфармацыю аб антытэрарыстычным папярэджанні МЗС Беларусі. “Не каментую паведамленні СМІ на гэтую тэму. Аднак я запэўніваю вас, што польскія службы ніколі не перамяншаюць ніякага трывожнага сігналу і да ўсёй інфармацыі аб магчымых пагрозах падыходзяць з належнай сур’ёзнасцю“, — заявіў інфармагенцтву PAP прэс-сакратар міністра — каардынатара спецыяльных службаў Яцэк Дабжыньскі.

24 ліпеня міністр замежных спраў Польшчы Радаслаў Сікорскі заявіў, што Варшава “сур’ёзна ставіцца да кожнага папярэджання аб тэрарызме”. Паводле яго слоў, якія перадае партал rmf24.pl, польскія ўлады правяраюць атрыманую інфармацыю.