МЗС пацведзіла смерць былога амбасадара ў Германіі Сідарэнкі

26 чэрвеня, Позірк. Міністэрства замежных спраў Беларусі на сваёй старонцы ў “Фэйсбуку” пацвердзіла смерць былога амбасадара Беларусі ў Германіі Дзяніса Сідарэнкі.

Адзначаецца, што развітанне з дыпламатам адбылося 26 чэрвеня.

Як паведамляў “Позірк”, Сідарэнка памёр 24 чэрвеня ва ўзросце 48 гадоў ад сардэчнага прыступу.

Амбасаду ў Германіі ён узначальваў у 2016–2024 гадах. Вызвалены ад пасады ўказам Аляксандра Лукашэнкі 11 сакавіка гэтага года.

Сідарэнка змяніў на пасадзе амбасадара ў ФРГ Андрэя Гіро, які памёр 17 лістапада 2015 года таксама ва ўзросце 48 гадоў ад анкалагічнага захворвання.

У інтэрв’ю выданню “Берлінскі Тэлеграф”, якое выйшла 7 сакавіка, за чатыры дні да ўказа аб адстаўцы, Сідарэнка заявіў, што 2023 год не стаў “паваротным момантам або новым пазітыўным этапам для беларуска-германскіх адносін”.

“Гэта быў, хутчэй, яшчэ адзін год страчаных магчымасцяў і нерэалізаванага патэнцыялу. Афіцыйны Берлін, на шкоду агульным інтарэсам і насуперак кааператыўнай логіцы, працягваў прытрымлівацца лініі на далейшае абмежаванне палітычнага дыялогу і супрацоўніцтва паміж нашымі краінамі. Такое негатыўнае пазіцыянаванне нямецкага боку аказвала разбуральнае ўздзеянне на двухбаковае ўзаемадзеянне практычна ва ўсіх сферах, уключаючы эканоміку і кантакты паміж людзьмі”, — сказаў амбасадар.

Паводле сцвярджэння Сідарэнкі, Еўрасаюз і Германія “аддалі перавагу небяспечнай і бесперспектыўнай логіцы жорсткай канфрантацыі, фізічнага адгароджвання ад суседзяў, блокавага дзялення краін на “сваіх і чужых”, фрагментацыі і поўнага дэмантажу ўсёй архітэктуры еўрапейскай бяспекі”.