Беларусь ратыфікавала пагадненне з В’етнамам аб узаемнай перадачы асуджаных

5 ліпеня, Позірк. Беларусь завяршыла ўнутрыдзяржаўныя працэдуры па ратыфікацыі пагаднення з В’етнамам аб узаемнай перадачы асуджаных асоб для далейшага адбывання пакарання. Адпаведны закон апублікаваны 5 ліпеня на Нацыянальным прававым інтэрнэт-партале.

Палата прадстаўнікоў Нацыянальнага сходу прыняла гэты дакумент 30 траўня. Прэс-служба ніжняй палаты парламента, паведамляючы пра гэта, адзначыла, што бакі дамовіліся на запыт перадаваць адзін аднаму “асуджаных, якія адбываюць пакаранне ў выглядзе пазбаўлення волі за здзяйсненне злачынстваў на тэрыторыі перадаючага боку, для адбывання астатняй часткі пакарання на тэрыторыі прымаючага боку”.

“Пытанні, звязаныя з выкананнем прыгавору, будуць рэгулявацца ў адпаведнасці з нацыянальным заканадаўствам кожнага з бакоў. Бок можа прыняць рашэнне аб памілаванні, амністыі ці змякчэнні пакарання, пра што інфармуецца іншы бок”, — гаварылася ў паведамленні.

Згаданае пагадненне было падпісана ў ліку іншых дакументаў летась у снежні, калі В’етнам наведваў прэм’ер-міністр Раман Галоўчанка. Тады ж было падпісана міжурадавае пагадненне аб скасаванні віз.