На рост цэн у Беларусі ўплываюць унутраны і вонкавы фактары — лічыць ЕАБР

15 ліпеня, Позірк. Асноўныя праінфляцыйныя фактары ў Беларусі маюць унутраную і вонкавую прыроду, вынікае са штотыднёвага макраагляду Еўразійскага банка развіцця (ЕАБР).

Вонкавым фактарам, які ўплывае на рост цэн у краіне, аналітыкі лічаць “падвышаную інфляцыя ў Расіі — ключавым гандлёвым партнёры Беларусі”. У чэрвені цэны ў РФ выраслі на 0,64%, са студзеня — на 3,88%, у гадавым выражэнні — на 8,59%.

Праінфляцыйным фактарам унутранага характару эксперты лічаць “рост спажывецкага попыту”.

ЕАБР пацвердзіў свой прагноз па інфляцыі — 6% па выніках года.

Спажывецкія цэны ў Беларусі ў чэрвені 2024 года выраслі на 0,6%: харчовыя тавары падаражэлі на 0,8%, нехарчовыя — на 0,4%, паслугі — на 0,5%.

Ад пачатку года рост цэн склаў 3,4%: на харчовую прадукцыю яны павялічыліся на 3,7%, нехарчовую — на 2,5%, паслугі — на 4%.

У гадавым выражэнні (да чэрвеня 2023-га) зафіксавана павелічэнне цэн на 5,8%: на харчовыя тавары — на 6,4%, нехарчовыя — на 4,5%, паслугі — на 6,6%.

Урад “зрабіў пэўныя захады, каб узяць пад кантроль сістэму цэнаўтварэння”, і сёння “ў нейкай ступені” стрымліваць рост цэн удаецца, заявіў Аляксандр Лукашэнка 28 сакавіка на нарадзе аб працы банкаўскай сістэмы. Паводле яго слоў, ад практыкі дзяржрэгулявання цэн у Беларусі “не адступяць”.

“Сістэма кантролю за цэнаўтварэннем, за гэтым усім комплексам будзе толькі ўзмацняцца. Такая задача пастаўлена перад урадам. Я прашу мець гэта на ўвазе і Нацыянальнаму банку, і рабіць усё неабходнае, каб людзі менш на нас крыўдзіліся ў сувязі з ростам цэн, інфляцыяй у краіне”, — сказаў Лукашэнка.

Даследчы цэнтр BEROC раней заяўляў, што “верагоднасць змены падыходу ўрада да цэнавага рэгулявання як мінімум у першым паўгоддзі ацэньваецца нізкай”. “Яно працягне прымяняцца ў жорсткай форме, што будзе стрымліваць перанос выдаткаў у цэны і весці да назапашвання інфляцыйнага навеса”, — прагназавала арганізацыя.

Эксперты не выключылі, што сістэма цэнавага кантролю можа быць скарэктаваная ў сярэдзіне года.

На думку праекта “Кошт урада”, даныя ўладаў па выніках праведзенага 20 красавіка рэспубліканскага суботніка сведчаць пра тое, што “інфляцыі ў Беларусі схільная нават бясплатная праца”. “Гэта той выпадак, які ўскосна выдае, што рост цэн у краіне істотна вышэйшы за тыя лічбы, якія публікуе Белстат”, — адзначылі эксперты.

Згодна з важнейшымі прагнознымі (дэ-факта планавымі) параметрамі развіцця краіны на 2024 год, інфляцыя не павінна перавысіць 6%.

BEROC чакае, што рост цэн па выніках года складзе 6%, Міжнародны валютны фонд прагназуе 6,3%, Еўразійскі фонд стабілізацыі і развіцця ацэньвае на ўзроўні 5,8%.

У 2023 годзе цэны выраслі на 5,8%.