За суткі ў Беларусі патанула 20 чалавек — ТРВОД

15 ліпеня, Позірк. За мінулыя суткі ў Беларусі патанула 20 чалавек, у тым ліку адзін непаўнагадовы, паведамляе Беларускае рэспубліканскае таварыства ратавання на водах (ТРВОД).

Адзначаецца, што выратавана 16 чалавек, з якіх 6 — непаўналетнія.

Міністэрства па надзвычайных сітуацыях у сутачнай зводцы паведаміла пра пяць выпадкаў гібелі людзей на вадзе.

У рацэ Пціч каля вёскі Крынка Асіповіцкага раёна (Магілёўская вобласць) знойдзена цела мужчыны 1964 года нараджэння.

Грамадзянін 1966 г.н. патануў у рацэ Сож у Чэрыкаве (Магілёўская вобласць).

З ракі Волма ў аграгарадку Смілавічы Чэрвеньскага раёна (Мінская вобласць) вынятыя мужчыны 1985 г.н. і 2000 г.н.

У рацэ Дуброўка каля вёскі Манчакі Лагойскага раёна (Мінская вобласць) загінуў мужчына 1995 г.н.

Паводле звестак МНС, 12 і 13 ліпеня ў вадаёмах Беларусі патанула сем чалавек.

11 ліпеня намеснік старшыні Мінгарвыканкама Алег Корзун на сустрэчы з калектывам УП “Рэмаўтадар Цэнтральнага раёна” паведаміў, што ўлады Мінска прынялі рашэнне аб закупцы беспілотных лятальных апаратаў (БПЛА), каб “адсочваць абстаноўку на пляжах яшчэ больш аператыўна”.

“Асабліва пытанне актуальнае ў гарачае надвор’е, калі мноства людзей адпраўляюцца да вадаёмаў. Каб адпачынак не павярнуўся трагедыяй, праводзіцца шырокая прафілактычная праца, на купальны сезон адкрываюцца дадатковыя сезонныя выратавальныя пасты ТРВОД”, — сказаў Корзун.

Паводле звестак ТРВОД, у 2023 годзе ў Беларусі патанула 339 чалавек — на 12,2% менш, чым у 2022-м. Непаўналетніх загінула на вадзе 21 (годам раней — 25; -16%).

Паведамлялася, што 55,2% загінулых (187 чалавек, у тым ліку два падлеткі) знаходзілася ў стане алкагольнага або наркатычнага ап’янення.