На фоне частых паведамленняў аб гібелі людзей на вадзе ўлады Мінска анансавалі прымяненне БПЛА для кантролю пляжаў
11 ліпеня, Позірк. Каб “адсочваць абстаноўку на пляжах яшчэ больш аператыўна”, улады Мінска прынялі рашэнне аб закупцы для гэтых мэтаў беспілотных лятальных апаратаў (БПЛА), паведаміў 11 ліпеня намеснік старшыні Мінгарвыканкама Алег Корзун на сустрэчы з калектывам УП “Рэмаўтадар Цэнтральнага раёна”.
Чакаецца, што “дапамагаць ратавальнікам” аператары БПЛА “пачнуць ужо ў гэтым купальным сезоне”, цытуюць чыноўніка дзяржСМІ.
“Асабліва пытанне актуальнае ў гарачае надвор’е, калі мноства людзей адпраўляюцца да вадаёмаў. Каб адпачынак не павярнуўся трагедыяй, праводзіцца шырокая прафілактычная праца, на купальны сезон адкрываюцца дадатковыя сезонныя выратавальныя пасты ТРВОД”, — сказаў Корзун.
Паводле яго слоў, мінскія ўлады “вялікую ўвагу надаюць не толькі ўладкаванню ўзбярэжжаў, але і бяспецы адпачывальнікаў”.
Заява намесніка старшыні Мінгарвыканкама прагучала на фоне рэгулярных паведамленняў аб гібелі людзей на вадзе па ўсёй Беларусі, у тым ліку ў Мінску.
8 ліпеня паведамлялася, што за папярэднія суткі ў Беларусі патанула 9 чалавек.
Значны рост гібелі дзяцей ад знешніх прычын, у тым ліку ў выніку ўтаплення канстатавала 5 ліпеня начальнік упраўлення Генеральнай пракуратуры па наглядзе за выкананнем заканадаўства аб непаўналетніх і моладзі Вікторыя Фіневіч.
З пачатку года ў краіне патанула 14 дзяцей, у тым ліку 9 — у чэрвені. Гэта адбылося “ў тым ліку праз недагляд дарослых, якія не пракантралявалі належным чынам, дзе знаходзяцца іх дзеці, ці бяспечна праводзяць свой вольны час”, сказала прадстаўніца нагляднага органа, падкрэсліўшы, што “фактычна ўсе патанулыя на вадаёмах непаўналетнія былі пакінутыя без нагляду бацькоў”.
Паводле звестак ТРВОД, у 2023 годзе ў Беларусі патанула 339 чалавек — на 12,2% менш, чым у 2022-м. Непаўналетніх загінула на вадзе 21 (годам раней — 25; -16%).
Паведамлялася, што 55,2% загінулых (187 чалавек, у тым ліку два падлеткі) знаходзілася ў стане алкагольнага або наркатычнага ап’янення.