МАРГ выкрыў дзяржпрадпрыемства на завышэнні коштаў на гародніну і садавіну
15 ліпеня, Позірк. Галоўным упраўленнем па Мінску Міністэрства антыманапольнага рэгулявання і гандлю (МАРГ) “у рамках кантролю за сітуацыяй на спажывецкім рынку” ў чэрвені выяўлены парушэнні ў цэнаўтварэнні на унітарным прадпрыемстве “Партызанскае”, паведамляе прэс-служба ведамства.
“Прадпрыемства пры фарміраванні адпускных цэн на свежыя капусту белакачанную, бульбу, моркву і яблыкі айчыннай вытворчасці ўраджаю 2023 года, закладзеных у стабілізацыйны фонд, за кошт акруглення адпускных цэн з парушэннем устаноўленых патрабаванняў заканадаўства дапусціла завышэнне прыбытку, уключанага ў адпускную цану”, — гаворыцца ў паведамленні.
Сцвярджаецца, што гэта прывяло да “перавышэння ўстаноўленага нарматыву рэнтабельнасці” і ў парушэнне заканадаўства прынесла кампаніі дадатковы даход у памеры больш за 15 тыс. рублёў.
На “Партызанскае” і адказную службовую асобу прадпрыемства складзены пратакол па ч. 2 арт. 13.2 КаАП (парушэнне ўстаноўленых упаўнаважанымі дзяржаўнымі органамі (арганізацыямі) фіксаваных і (або) гранічных цэн (тарыфаў), гранічных нарматываў рэнтабельнасці, гранічных надбавак (зніжак, нацэнак)).
Матэрыялы перададзены ў Эканамічны суд Мінска.
УП “Партызанскае”, якое знаходзіцца ў падпарадкаванні Мінгарвыканкама, займаецца аптовым гандлем сельскагаспадарчай прадукцыяй і іншымі прадуктамі харчавання. Стварае стабілізацыйныя фонды бульбы і агародніны для “бесперабойнага забеспячэння насельніцтва Мінска плодаагародніннай прадукцыяй на працягу ўсяго года”. Асноўныя віды прадукцыі — бульба, буракі, морква, цыбуля, капуста, яблыкі.
Дзяржрэгуляванне цэн уведзена ў Беларусі восенню 2022 года з ініцыятывы Аляксандра Лукашэнкі. За парушэнне адпаведнай пастановы ўрада прадугледжана (і неаднаразова прымянялася) як адміністрацыйная, так і крымінальная адказнасць.
Урад “прыняў пэўныя меры, каб узяць пад кантроль сістэму цэнаўтварэння”, і сёння “ў нейкай ступені” стрымліваць рост цэн удаецца, заявіў Аляксандр Лукашэнка 28 сакавіка на нарадзе аб рабоце банкаўскай сістэмы. Паводле яго слоў, ад практыкі дзяржрэгулявання цэн “не адступяць”.
“Сістэма кантролю за цэнаўтварэннем, за гэтым усім комплексам будзе толькі ўзмацняцца. Такая задача пастаўлена перад урадам. Я прашу мець гэта на ўвазе і Нацыянальнаму банку, і рабіць усё неабходнае, каб людзі менш на нас крыўдзіліся ў сувязі з ростам коштаў, інфляцыяй у краіне”, — сказаў Лукашэнка.
З пачатку года рост цэн склаў 3,4%. На харчовую прадукцыю яны павялічыліся на 3,7%, нехарчовую — на 2,5%, паслугі — на 4%.
У гадавым вымярэнні (да чэрвеня 2023-га) зафіксавана павелічэнне коштаў на 5,8%: на харчовыя тавары — на 6,4%, нехарчовыя — на 4,5%, паслугі — на 6,6%.
Згодна з найважнейшымі прагнознымі (дэ-факта планавымі) параметрамі развіцця краіны на 2024 год, інфляцыя не павінна перавысіць 6%.
У 2023 годзе цэны выраслі на 5,8%.