Рост эканомікі Беларусі запаволіўся, сведчаць даныя Белстата

17 ліпеня, Позірк. Валавы ўнутраны прадукт Беларусі за студзень — чэрвень 2024 года склаў 113,8 млрд рублёў — у супастаўных цэнах на 5% больш, чым за аналагічны перыяд 2023-га, вынікае з першай ацэнкі Нацыянальнага статыстычнага камітэта.

Індэкс-дэфлятар ВУП у адносінах да аналагічнага перыяду папярэдняга года вырас на 10,7%.

У студзені рост эканомікі склаў 2,8%, студзені — лютым — 4%, студзені — сакавіку — 4,1%, студзені — красавіку — 5,1%, студзені — траўні — 5,2%.

Згодна з найважнейшымі прагнознымі (дэ-факта планавымі) параметрамі развіцця краіны на 2024 год, прырост ВУП павінен скласці 3,8%.

Акадэмічны дырэктар даследчага цэнтра BEROC Леў Львоўскі адзначаў у інтэрв’ю “Позірку”, што “ўлады і на 2024 год паставілі мэту росту ВУП на 3,8%”, але для мінулага і цяперашняга гадоў гэта “зусім розныя лічбы”.

“Летась мы мелі аднаўленчы рост пасля падзення на 4,7% у 2022-м. Аднаўляцца заўсёды прасцей, чым расці. Але нават гэтае аднаўленне падвяло эканоміку да стану перагрэву”, — перакананы эканаміст.

Па выніках студзеня — траўня 2024 года ВУП у Еўразійскім эканамічным саюзе вырас на 5,2%: у Арменіі — на 9,2%, Кыргызстане — на 8,8%, Расіі — на 5,4%, Беларусі — на 4,1%, Казахстане — на 3,8%.

Нягледзячы на “дастаткова спрыяльную дынаміку ключавых макраэканамічных паказчыкаў у базавым сцэнарыі”, эканоміка Беларусі “застаецца ўразлівай да ўнутраных і знешніх шокаў”, адзначана ў летнім прагнозе Еўразійскага фонду стабілізацыі і развіцця (ЕФСР).

Міжнародны валютны фонд чакае рост беларускай эканомікі на ўзроўні 2,4%, Сусветны банк — 1,2%, Еўрапейскі банк рэканструкцыі і развіцця — 2,8%, даследчы цэнтр BEROC — 4%, Еўразійскі фонд стабілізацыі і развіцця — 3,7%.

У 2023 годзе ВУП вырас на 3,9%, у 2022-м — знізіўся на 4,7%, у 2021-м эканоміка вырасла на 2,3%, у 2020-м — скарацілася на 0,9%.