Мінінфарм вынес папярэджанне “Восьмаму каналу”

2 жніўня, Позірк. Прыватнаму “Восьмаму каналу” вынесена папярэджанне за парушэнне патрабаванняў заканадаўства аб СМІ, паведамляе Міністэрства інфармацыі.

Яно накіравана ТАА “8 канал” за “размяшчэнне ў тэлепраграме матэрыялаў, якія змяшчаюць інфармацыю, распаўсюджванне якой не дапускаецца”.

Падрабязнасці не прыводзяцца.

“Восьмы канал” пачаў вяшчанне ў 1996 годзе ў Мінску. Канал пазіцыянуе сябе як сямейна-забаўляльны.

У студзені ведамства вынесла пісьмовае папярэджанне за невыкананне патрабаванняў заканадаўства заснавальніку беларускай версіі расійскага канала “ТВ 3”, якую транслююць тэлекамунікацыйныя аператары “КОСМАС ТБ” і МТС.

У 2023 годзе па розных падставах папярэджання вынесены рэдакцыі гродзенскай дзяржаўнай радыёстанцыі “Радыё MFM”, мабільнаму аператару А1, тэлеканалу “Europa Plus TV” і “БелМузТВ”.

Пасля двух папярэджанняў на працягу года Мінінфарм можа ініцыяваць ліквідацыю СМІ.