Шэраг дэмакратычных структур дамовіўся пра супрацу ў рамках “Платформы 2025” (абноўлена)

абноўлена пасля публікацыі дакумента

4 жніўня, Позірк. Пра супрацу шэрагу дэмакратычных структур у рамках “Платформы 2025” абвешчана 3 жніўня ў Вільнюсе на канферэнцыі “Новая Беларусь”.

На форуме было заяўлена, што дакумент з’яўляецца “рамкай для сумеснай працы дэмакратычных сіл, інструментам для каардынацыі дзеянняў”, у якім зафіксаваныя прыярытэты падпісантаў.

У дакуменце адзначана, што беларусы — “еўрапейскі народ, які мае права на свабоду і справядлівасць”, што ў 2020 годзе прадэманстраваў “сваю годнасць”, варты і імкнецца “да лепшай будучыні ў Беларусі”.


Падпісанты дэкларуюць еднасць у тым, што Аляксандр Лукашэнка “злачынна ўтрымлівае ўладу, абапіраючыся на рэпрэсіі і падтрымку Крамля”, “ні ён, ні падкантрольныя яму органы не маюць легітымнасці для прызначэння і правядзення выбараў”. Зыходзячы з гэтага электаральная кампанія 2025 года абвешчаная “імітацыяй выбараў” прэзідэнта.

Праз “татальныя рэпрэсіі” беларусы “не змогуць убачыць дэмакратычных кандыдатаў” у бюлетэнях, “паўдзельнічаць у мітынгах і агітацыйнай кампаніі”, адзначана ў дакуменце.

Удзельнікі “Платформы 2025” заяўляюць аб падтрымцы “дзейнасці інстытутаў дэмакратычных сіл Беларусі — Святланы Ціханоўскай, Аб’яднанага пераходнага кабінета, Каардынацыйнай рады, а таксама дзейнасць партый, арганізацый і ініцыятыў, якія працягваюць барацьбу за дэмакратычныя змены ў Беларусі”.

Падпісанты дакумента патрабуюць “спынення ўсіх відаў рэпрэсій, вызвалення палітвязняў, рэалізацыі права ўсіх грамадзян Беларусі на паўнавартасны ўдзел у выбарах незалежна ад месца жыхарства, забеспячэння свабоды сходаў і роўнага доступу да СМІ, а таксама правядзення выбараў у адпаведнасці з міжнароднымі стандартамі АБСЕ і пад кантролем назіральнікаў”.

Удзельнікі “Платформы 2025” дэкларуюць намер ладзіць “сумесныя грамадска-палітычныя дзеянні, вынікам якіх стане непрызнанне беларускай і міжнароднай супольнасцю вынікаў імітацыі выбараў”.

Згодна з прапісанымі ў дакуменце мэтамі, яго падпісанты імкнуцца “не дапусціць легітымацыі рэжыму Лукашэнкі ў вачах беларускай і міжнароднай супольнасці”; “быць еднымі дзеля Беларусі”, “аб’ядноўвацца для супольнай дзейнасці, а не змагацца адно супраць аднаго”, прызнаючы агульнымі ворагамі “недэмакратычныя рэжымы Лукашэнкі і Пуціна”. Яны таксама маюць намер “дамагацца адкрытасці Еўропы і ўсяго дэмакратычнага свету для беларусаў”, каб тыя “выразна адрознівалі” народ ад рэжыму; прасоўваць “павестку перамен, якія выведуць краіну з ізаляцыі, вайны і крызісу — у годную будучыню”.

Апрача таго, удзельнікі “Платформы 2025” вырашылі разам “фармаваць разнастайны інфармацыйны ландшафт, заснаваны на дэмакратычных каштоўнасцях, які з’яўляецца неабходным для супрацьдзеяння прапагандзе і дэзынфармацыі рэжыму”, і “садзейнічаць расколу эліт для дэмакратычнага транзіту”. Пры гэтым яны “адкрытыя да дыялогу з дзяржаўнымі служачымі, якія выступаюць за незалежную і дэмакратычную Беларусь”.

Каб дасягнуць гэтых мэт падпісанты ставяць перад сабой задачы аб’яднаць “намаганні па вызваленні палітвязняў і спыненні рэпрэсій” з дапамогай “санкцыйнага і дыпламатычнага ціску на рэжым, працы па гуманітарным спісе і гуманітарных перамоў”. Дэкларуецца намер “дамагацца дэлегітымацыі рэжыму дыпламатычнымі дзеяннямі”, “кансалідаваць намаганні з іншымі краінамі і міжнароднымі арганізацыямі, а таксама парламенцкай супольнасцю праз альянс дэпутацкіх групаў “За дэмакратычную Беларусь”.

Удзельнікі “Платформы 2025” плануюць “дамагацца прыцягнення да адказнасці Лукашэнкі і яго паплечнікаў за злачынствы супраць беларускага народа і міжнародныя злачынствы”, “напоўніць зместам еўрапейскую перспектыву для Беларусі, зрабіць еўрапейскі выбар адчувальным, а яго канкрэтныя перавагі — зразумелымі для ўсіх беларусаў”.

Яны ставяць перад сабой задачу “абараняць і прасоўваць інтарэсы беларусаў”, дзе б тыя ні знаходзіліся, “адвакатаваць пытанні выдачы віз і адкрыцця пасажырскіх пераходаў, доступу да атрымання адукацыі, вырашэння пытанняў легалізацыі”; “умацоўваць сувязі паміж беларусамі” з рознымі поглядамі — унутры краіны і па-за яе межамі — “праз сумесныя дзеянні, узмацняць патэнцыял беларускіх арганізацый”.

Падпісанты маюць намер “пашыраць аўдыторыю, супрацьстаяць прапагандзе і распаўсюджваць праўдзівую інфармацыю пра падзеі ў Беларусі”; прыцягваць моладзь да “актыўнага ўдзелу ў палітычных працэсах і абмеркаванні шляхоў развіцця будучыні” краіны; рыхтаваць “кампетэнтных спецыялістаў, кіраўнікоў і дзяржаўных служачых, якія будуць працаваць на карысць свайго народа”, а таксама “пакет праектаў рэформ і законаў будучай свабоднай Беларусі, уключаючы амністыю для пацярпелых ад палітычна матываваных рэпрэсій і канцэпцыю пераходнага правасуддзя, абмяркоўваць іх з грамадствам”.

Бакі таксама будуць “дэманстраваць перавагу працуючай дэмакратыі, і паказваць, як невыкананне стандартаў правядзення дэмакратычных выбараў прыводзіць да пагаршэння жыцця людзей”; “фіксаваць усе парушэнні падчас імітацыі выбараў і інфармаваць беларускую і міжнародную супольнасць”.


“На аснове “Платформы 2025″ мы будзем каардынаваць сумесныя дзеянні ў 2025 годзе, на агульных сустрэчах выпрацоўваць рэакцыі на актуальную павестку, і рабіць публічныя сумесныя справаздачы па дзейнасці ў рамках платформы”, — гаворыцца ў дакуменце, адкрытым для далучэння “ўсіх беларускіх дэмакратычных сіл (палітычных структур, грамадскіх арганізацый і ініцыятыў, дыяспар, суполак ды інш.)”, якія падзяляюць яго палажэнні.

Бакамі дакумента ўжо сталі Офіс Святланы Ціханоўскай, Аб’яднаны пераходны кабінет, Каардынацыйная рада ў цэлым і асобна яго фракцыі — “Каманда Латушкі і Рух “За Свабоду”, “Воля”, “Наша справа”, “Хопіць баяцца!”, “Еўрапейскі выбар” , а таксама фонд BYSOL, Фонд медыцынскай салідарнасці, ініцыятывы “Сумленныя людзі”, “Народныя амбасады”, дэ-юрэ ліквідаваныя ў Беларусі Аб’яднаная грамадзянская партыя і Рух “За Свабоду”.