Беларускія школьнікі ядуць недастаткова садавіны і гародніны і мала рухаюцца — прафесар БДМУ
7 жніўня, Позірк. Беларускія школьнікі ядуць недастаткова садавіны і агародніны, а таксама мала рухаюцца, заявіла прафесар кафедры гігіены і аховы здароўя дзяцей Беларускага дзяржаўнага медуніверсітэта (БДМУ) Алена Гузік на прэс-канферэнцыі ў Мінску 7 жніўня.
Паводле даследавання БДМУ (метадалогія і тэрміны правядзення названыя не былі), штодня ядуць садавіну 40-45% дзяцей школьнага ўзросту, гародніну — 37%. Паводле Гузік, гэта супастаўныя паказчыкі з краінамі Заходняй Еўропы.
Пры гэтым дзеці, адзначыла яна, злоўжываюць салодкімі напоямі, а гэта “найсур’ёзная праблема, звязаная з харчаваннем”: штодня салодкія напоі ўжывае каля 8,5% беларускіх дзяцей, сярэдні паказчык у Еўрапейскім рэгіёне — 17%.
Паводле даных БДМУ, 20% школьнікаў не снедаюць: у малодшых класах — каля 12-15%, у старэйшых — да 25%.
Калі дзіця не снедае, не абедае ў школе, а толькі перакусвае, непазбежна спажывае большую частку калорый на падвячорак ці на вячэру, у выніку павялічваецца рызыка развіцця залішняй масы цела і атлусцення, адзначыла медык.
Паводле прафесара, недахоп гародніны і садавіны, лішак салодкага вядзе таксама да развіцця дыябету, а арганізацыя здаровага і рэгулярнага харчавання — “вельмі сур’ёзная адказнасць бацькоў”.
“Колькі б ні арганізоўвалася харчаванне ў школах, калі дзіця не будзе дома снедаць, калі маці не будзе задумвацца над пытаннем, што яно будзе абедаць і вячэраць у хатніх умовах, ніякія праблемы з атлусценнем мы не зможам вырашыць”, — сказала яна.
Таксама Гузік выказала меркаванне, што для забеспячэння рухальнай актыўнасці дзяцей урокаў фізкультуры ў школе недастаткова. Згодна з рэкамендацыямі СААЗ, дзіцяці для нармальнага развіцця неабходна рухацца мінімум 60 хвілін штодзень, адзначыла ўрач.
Для дзяцей абавязковымі з’яўляюцца дадатковыя фізнагрузкі ці хаця б штодзённыя прагулкі на свежым паветры, падкрэсліла яна.
Паводле звестак БДМУ, каля 33% беларускіх школьнікаў займаюцца ў спартыўных секцыях, каля 12 працэнтаў маюць іншыя формы фізічнай актыўнасці, аднак за камп’ютарам у дзень праводзяць дзве гадзіны і больш за 60-70% дзяцей.
Яшчэ адным фактарам рызыкі для дзіцячага здароўя Гузік назвала недахоп сну. Паводле яе, каля трэці беларускіх школьнікаў спяць менш за сем гадзін, калі як працягласць сну ў іх павінна быць восем-дзевяць гадзін.
Паводле звестак Белстата за першыя шэсць месяцаў 2024 года, жыхары Беларусі сталі часцей ужываць свежую гародніну. Бульбы прададзена на 9,6% больш, чым за адпаведны перыяд мінулага года, рэпчатай цыбулі — на 10,8%, морквы — на 6,6%, агуркоў — на 14,5%, таматаў — на 2,3%.
У той жа час жыхары Беларусі сталі купляць менш мяса: продажы свініны скараціліся на 6,9%, ялавічыны — на 11,1%, свойскай птушкі і дзічыны — на 0,7%. Аднак на 3,9% павялічыліся продажы кансерваў з мяса і субпрадуктаў.
Продажы цукрыстых кандытарскіх вырабаў выраслі на 1,9%, у тым ліку шакаладу і прадуктаў, якія ўтрымліваюць какаву — на 7,1%.