У лясах Беларусі за суткі заблукалі чатыры чалавекі

8 жніўня, Позірк. За суткі ў лясах Беларусі заблукалі чатыры чалавекі, паведамляе прэс-служба Міністэрства па надзвычайных сітуацыях.

У Браслаўскім і Дубровенскім раёнах (Віцебская вобласць) жанчыны ў адзіночку пайшлі ў грыбы і не змаглі знайсці выхад з лесу. Прыбыўшыя ратавальнікі ўключылі святлосігнальную гучнагаворчую ўстаноўку пажарнага аўтамабіля, на гук якой блуканцы выйшлі.

У Брэсцкім раёне сваякі спрабавалі знайсці жанчыну, якая заблукала ў лесе, але безвынікова. Ратавальнікі звязаліся з ёй па мабільным тэлефоне і патлумачылі, як падзяліцца сваім месцазнаходжаннем. Арыентуючыся на геалакацыйную метку, яны змаглі знайсці жанчыну ў забалочанай мясцовасці.

У Кіраўскім раёне (Магілёўская вобласць) жанчыну, якая заблукала, атрымалася знайсці з дапамогай мясцовых жыхароў і ратавальнікаў.

МНС рэкамендуе наведваць лясы ў адзенні з яркімі элементамі. Варта браць з сабой запас вады, ежы і аптэчку; паведаміць блізкім ці сябрам пра месца знаходжання і час вяртання; браць з сабой цалкам зараджаны мабільны тэлефон; не схадзіць з пратаптаных сцежак і адзначаных маршрутаў.

Калі чалавек заблукаў, яму трэба звязацца з ратавальнікамі і заставацца на месцы.

На 10 ліпеня супрацоўнікі МНС выязджалі на пошукі зніклых людзей 95 разоў. Знайшлі 102 чалавекі, у тым ліку 20 дзяцей. Міністэрства канстатавала “значны рост” дзяцей, якія згубіліся: за ўвесь 2023 год прапала 18 непаўналетніх.