Ціханоўская: Рэгіянальнай бяспекі не будзе, пакуль Беларусь не стане свабоднай

8 жніўня, Позірк. Саўдзел Аляксандра Лукашэнкі ў расійскай агрэсіі супраць Украіны ставіць пад пагрозу і жыцці беларусаў. Рэгіянальнай бяспекі не будзе датуль, пакуль Беларусь не стане свабоднай, напісала дэмакратычны лідар Святлана Ціханоўская ў сацсетцы “Х” (“Твітар”).

Паводле слоў Ціханоўскай, у ліпені па меншай меры дзевяць расійскіх беспілотнікаў “Шахед” ўварваліся ў паветраную прастору Беларусі, з іх “адзін выбухнуў, іншы знік, а астатнія працягнулі палёт ва Украіну”.

Паветраныя сілы Узброеных сіл Украіны 16 ліпеня паведамілі, што ўкраінская супрацьпаветраная абарона знішчыла два ўдарныя беспілотнікі “Шахед” 15 і 16 ліпеня, яшчэ два “лакальна страчаныя” ў паветранай прасторы Беларусі.

Выданне “Украінская праўда” паведамляла, што адзін з дронаў увайшоў у прастору Беларусі ў 8:40 16 ліпеня курсам на Нароўлю (Гомельская вобласць), у 9:10 з аэрадрома Мачулішчы (Мінская вобласць) быў узняты верталёт Мі-24, у 9:15 з аэрадрома Баранавічы (Брэсцкая вобласць) — знішчальнік Су-30.

“Беспілотнік кружыць над Беларуссю і агулам праляцеў больш за 300 км. <…> Гэта ўжо чацвёрты дрон-камікадзэ, які ўвайшоў у паветраную прастору Беларусі, пачынаючы з 11 ліпеня, і другі толькі за 16 ліпеня”, — пісала “Украінская праўда”.

Афіцыйны Мінск паведамленні аб пралёце расійскіх баявых беспілотных лятальных апаратаў не каментаваў.