Мінтранс пагражае канфіскацыяй транспарту перавозчыкам па-за спецрэестрам

15 лютага, Позірк. Транспартныя сродкі арганізацый, якія не будуць уключаны ў рэестр аўтамабільных перавозак пасажыраў, могуць быць на падставе рашэння суда канфіскаваныя ў даход дзяржавы, заявіў на брыфінгу 15 лютага ў мінскім мультымедыйным прэс-цэнтры Sputnik начальнік упраўлення аўтамабільнага і гарадскога пасажырскага транспарту Міністэрства транспарту і камунікацый Андрэй Гладкі.

Паводле яго слоў, дзейнасць арганізацый па-за гэтым рэестрам забароненая. Не ўключаныя ў яго кампаніі будуць аўтаматычна пазбаўленыя магчымасці выплаціць штраф і вярнуць свой транспарт, як гэта можна зрабіць зараз у выпадку канфіскацыі за тыя ці іншыя парушэнні.

Гладкі сцвярджае, што каля 90% транспартных сродкаў кампаній, якія займаюцца нерэгулярнымі пасажырскімі перавозкамі, не адпавядае патрабаванням заканадаўства, у тым ліку ў плане бяспекі. Далёка не ўвесь транспарт праходзіць тэхагляд, не заўсёды праводзіцца штодзённы кантроль тэхнічнага стану, патлумачыў чыноўнік.

Стварэнне “рэестра аўтамабільных перавозак пасажыраў у нерэгулярных зносінах” прадугледжана ўказам № 32, які Аляксандр Лукашэнка падпісаў 25 студзеня. “Аператарам і ўладальнікам” рэестра будзе Транспартная інспекцыя Мінтранса, у яго будуць уносіць звесткі пра перавозчыкаў, транспартныя сродкі (аўтобусы, легкавыя аўтамабілі, аўтамабілі-таксі), кіроўцаў, дыспетчараў перавозак у нерэгулярных зносінах, дыспетчараў таксі.

З 1 жніўня па 31 кастрычніка 2024 года за ўключэнне ў рэестр дзяржаўная пошліна брацца не будзе.

Замежных дыспетчараў, якія хочуць працаваць на беларускім рынку, згаданы ўказ “Аб аўтамабільных перавозках пасажыраў” абавязвае ствараць юрыдычныя асобы на тэрыторыі краіны.

На нарадзе 14 лістапада 2023 года Лукашэнка заявіў, што той, “хто не ўключаны ў гэты рэестр, апынаецца па-за законам, яго дзейнасць будзе выяўляцца і спыняцца органамі кантролю”. За дзейнасць без уключэння ў рэестр ён прыгразіў “самым жорсткім пакараннем”.