Мезенцаў: Запуск медыяхолдынга Саюзнай дзяржавы адкладаецца з-за “канцэптуальных разыходжанняў”

31 кастрычніка, Позірк. “Канцэптуальныя разыходжанні” паміж расійскім і беларускім бакамі перашкаджаюць стварэнню медыяхолдынга Саюзнай дзяржавы (СД), заявіў дзяржаўны сакратар СД Дзмітрый Мезенцаў у інтэрв’ю тэлеканалу “Беларусь 1”.

Паводле слоў Мезенцава, у бакоў ёсць рознагалоссі, якія датычацца бачання таго, “якой павінна быць сетка вяшчання, які павінен быць масіў прадстаўляемай інфармацыі і праз якія сродкі”.

“Гэтыя спрэчкі яшчэ не скончаныя, але я думаю, што абавязацельствы ў рамках рэалізацыі даручэнняў старшыні Вышэйшага дзяржаўнага савета [Саюзнай дзяржавы Аляксандра Лукашэнкі] для нас — гэта прамое даручэнне паскорыць такую працу”, — сказаў Мезенцаў.

Чыноўнік адзначыў, што “пройдзены пэўны шлях, і ў рамках сумеснай калегіі Мінінфарма Беларусі і Мінлічбы Расіі падрыхтавана прапанова па стратэгіі развіцця саюзных СМІ”.

“З тым каб вось гэтая палітра поглядаў і ўяўленняў з розных тэлеэкранаў — у пераносным сэнсе слова — новай інфармацыі, прадметнай інфармацыі, сучаснай інфармацыі, актуальнай, яна была даступнай паспяховай і прафесійнай”, — сказаў Мезенцаў.

У ліпені 2023 года Міністэрства лічбавага развіцця, сувязі і масавых камунікацый РФ паведаміла, што медыяхолдынг Саюзнай дзяржавы Беларусі і Расіі з’явіцца не раней за 2024 год.

З ідэяй стварыць медыяхолдынг СД Аляксандр Лукашэнка выступіў на пасяджэнні Вышэйшага дзяржсавета 4 лістапада 2021 года ў Маскве, калі зацвярджаліся саюзныя праграмы. Тады меркавалася, што структура з’явіцца да канца 2022 года, але гэтага не адбылося.

9 студзеня 2023 года на сустрэчы з Мезенцавым Лукашэнка назваў новыя тэрміны: “Медыяхолдынг сёлета, пажадана ў першай палове года, павінен запрацаваць”.

30 сакавіка дэпутат Палаты прадстаўнікоў Нацыянальнага сходу Беларусі Генадзь Давыдзька на пасяджэнні ўзначаленай ім камісіі Парламенцкага сходу Беларусі і РФ па інфармацыйнай палітыцы, інфармацыйных тэхналогіях і сувязі выказаў незадаволенасць “нейкай празмернай засакрэчанасцю і кулуарнасцю” распрацоўкі канцэпцыі медыяхолдынга. На пасяджэнні Вышэйшага дзяржсавета СД 6 красавіка Лукашэнка ў чарговы раз заявіў аб неабходнасці стварэння “сур’ёзнага саюзнага медыяхолдынга”. “Мы не маем права прайграць бітву за розумы і сэрцы нашых грамадзян… Ідэалагічнае супрацьстаянне па лініі Захад — Усход не аслабее нават пасля таго, як замаўчаць гарматы. Гэта надоўга”, — сказаў ён.