Намінальны сярэдні заробак вырас за месяц на 6,7% (дапоўнена)

24 красавіка, Позірк. Намінальны налічанаы сярэдні заробак работнікаў Беларусі сёлета ў сакавіку склаў 2.161,1 рубля — на 135,4 рубля больш (+6,7%), чым у лютым, вынікае з інфармацыі Нацыянальнага статыстычнага камітэта.

У сакавіку 2023 года гэты паказчык складаў 1.814,2 рубля (рост за год — 19,1%).

Паводле ўзроўню намінальнага заробку традыцыйна лідзіруе Мінск — 3.005,4 рубля (у лютым студзені — 2.768; +8,6%). У Мінскай вобласці ён склаў 2.160,8 (2.019,3; +7%), Гомельскай — 1.938,9 (1.842,9; +5,2%), Гродзенскай — 1.905,7 (1.763,4; +8,1%), Брэсцкай — 1.877,5 (1.739,1; +8%), Віцебскай — 1.782,8 (1.698,4; +5%), Магілёўскай — 1.774,3 (1.686,2; +5,2%).

Больш за ўсё ў лютым было налічана работнікам сектара інфармацыі і сувязі — 6.012,5 рубля (5.349,3 у лютым). Далей ідуць прадстаўнікі сферы фінансаў і страхавання — 3.457,3 (3.411,7); прафесійнай, навуковай і тэхнічнай дзейнасці — 2.814 (2.461,4); будаўніцтва — 2.382,8 (2.228,5); прамысловасці — 2.340,6 (2.202,7); транспарту і лагістыкі — 2.072,3 (1.955,9); аптовага і рознічнага гандлю — 1.972,7 (1.839,7); аперацый з нерухомай маёмасцю — 1.904,8 (1.731,5); іншых відаў паслуг — 1.726,3 (1.544,5); аховы здароўя і сацыяльных паслуг — 1.723,7 (1.672,5); сельскай, лясной і рыбнай гаспадаркі — 1.701 (1.562,4); творчасці, спорту, забаў і адпачынку — 1.543,2 (1.457); сферы паслуг па часовым пражыванні і харчаванні — 1.534,5 (1.436,3); дзейнасці ў галіне адміністрацыйных і дапаможных паслуг — 1.522,7 (1.388,1), адукацыі — 1.505,9 (1.489,3).

Згодна з важнейшымі прагнознымі (дэ-факта планавымі) параметрамі развіцця краіны на 2024 год, згодна з якімі рэальныя грашовыя даходы насельніцтва павінны вырасці на 3,5%, рэальныя заробкі — на 3,9%, намінальны сярэднямесячны заробак павінен узрасці да 2.087 рублёў (у бюджэтным сектары — да 1.634).

Інфляцыя ў сакавіку 2024 года склала 0,5% да лютага гэтага года, да снежня і сакавіка мінулага года 2,2% і 5,6% адпаведна.