ДПК заявіў пра затрыманне экс-байца Французскага легіёна, які збіраў беспілотнікі для кантрабандыстаў
31 траўня, Позірк. Грамадзяніна Беларусі, які мае дачыненне да “перамяшчэння таварна-матэрыяльных каштоўнасцяў праз дзяржаўную мяжу”, затрымалі 29 траўня ў Маладзечне (Мінская вобласць) супрацоўнікі Полацкага пагранічнага атрада пры падтрымцы сталічнага АМАПа.
Паводле інфармацыі Дзяржаўнага пагранічнага камітэта, на месцы затрымання знойдзеныя “камплектуючыя для зборкі БЛА, паветраная вінтоўка “саматужнай вытворчасці”, нямецкая вінтоўка Mauser, боепрыпасы калібра 7.62 мм, кулі для дробнакалібернай вінтоўкі, таксама значкі, шэўроны і медалі Французскага Замежнага легіёна, нацысцкая сімволіка”.
Ведамства сцвярджае, што ў 2000–2005 гадах мужчына служыў у Французскім легіёне, удзельнічаў у баявых дзеяннях на тэрыторыі Афрыкі.
“Са слоў затрыманага, цяпер яго хобі — зборка беспілотнікаў для асабістых мэт. Акрамя таго, высветлена, што мужчына актыўна ўдзельнічае ў абмеркаванні розных тэм у экстрэмісцкіх тэлеграм-каналах”, — гаворыцца ў паведамленні.
Затрыманы змешчаны ў ізалятар Маладзечанскага РАУС, у дачыненні да яго распачатая крымінальная справа.
У красавіку і траўні Дзяржпагранкамітэт паведаміў пра чатыры выпадкі незаконнага выкарыстання беспілотнікаў у прыграніччы, у агульнай колькасці было затрымана сем чалавек.
1 красавіка набыў моц указ № 297 “Аб дзяржаўным уліку і эксплуатацыі грамадзянскіх беспілотных лятучых апаратаў”. Дакумент забараніў увоз, захоўванне, абарот, эксплуатацыю і выраб беспілотнікаў і выкарыстанне імі паветранай прасторы Беларусі без належнага дазволу.
У выніку атакі БПЛА 26 лютага 2023 года ў Мачулішчах (Мінскі раён) атрымаў пашкоджанні і быў транспартаваны на рамонт у РФ дарагі расійскі ваенны самалёт далёкага радыёлакацыйнага выяўлення А-50.
7 сакавіка таго ж года, тлумачачы прычыны дыверсіі на вайсковым аэрадроме ў Мачулішчах, Лукашэнка заявіў, што сістэмы СПА не змаглі выявіць дрон з выбухоўкай, бо ён быў “маленькі”.
Французскі легіён — злучэнне ў складзе сухапутных войскаў Францыі, якое камплектуецца пераважна з замежнікаў. Было створана ў 1831 годзе як падраздзяленне для баявых дзеянняў па-за межамі Францыі. Цяпер падпарадкоўваецца наўпрост прэзідэнту краіны. Ацэначная колькасць — каля 9 тыс. чалавек.