Памёр яшчэ адзін пацярпелы ў аварыі ў Івацэвіцкім раёне

26 жніўня, Позірк. У рэанімацыі памёр мужчына 1973 года нараджэння, які атрымаў мноства траўм у дарожна-транспартным здарэнні на трасе Р-6 (Івацэвічы — Пінск — Столін), паведамляе прэс-служба Міністэрства аховы здароўя.

Каля 11:00 25 жніўня ў Івацэвіцкім раёне (Брэсцкая вобласць), на 42-м кіламетры згаданай аўтадарогі, аўтамабіль “Пежо 406” выехаў на сустрэчную паласу і сутыкнуўся з “Пежо 5008”.

Пацярпела шэсць чалавек. 51-гадовы пасажыр “Пежо 406” загінуў на месцы, кіроўца гэтага аўтамабіля была шпіталізаваная, 2-гадовае дзіця, якое знаходзілася ў салоне, пасля аказання меддапамогі накіравалі на амбулаторнае назіранне ў паліклініку.

У бальніцу даставілі таксама кіроўцу і дзвюх пасажырак (13 і 50 гадоў) аўтамабіля “Пежо 5008”.

У адной з іх дыягнаставана спалучаная траўма (закрытая чэрапна-мазгавая траўма, разрыў брыжэйкі тонкага і тоўстага кішачніка, закрыты пералом правай ключыцы, адкрыты пералом абедзвюх лодыжак правай галёнкі з падвывіхам ступні навонкі), яна прааперыраваная.

“Пацыентам з траўмамі, якія не маюць патрэбы ў аператыўным лячэнні, аказваецца неабходная дапамога ў поўным аб’ёме ў траўматалагічным аддзяленні цэнтральнай раённай бальніцы Івацэвічаў”, — паведамляе Мінздароўя.

Паводле інфармацыі ведамства, усе пацярпелыя — жыхары Пінска (Брэсцкая вобласць).