38-я дэсантна-штурмавая брыгада асвойвае “вопыт СВА” на метадычным зборы

30 жніўня, Позірк. Аб метадычным зборы, які праходзіць у 38-й Брэсцкай гвардзейскай дэсантна-штурмавой брыгадзе, паведамляе прэс-служба Міністэрства абароны.

Падкрэсліваецца, што “асаблівая ўвага” на зборы “надаецца ўкараненню вопыту СВА ў працэс баявой падрыхтоўкі”.

“Сярод актуальных кірункаў — штурм апорнага пункта праціўніка, праца з БПЛА рознага тыпу і супрацьдзеянне БПЛА праціўніка, тактычная медыцына і аказанне першай дапамогі пры розных раненнях”, — адзначае ведамства.

“Ніякіх загадаў, каб ісці ваяваць за межы Беларусі, не было і не будзе”, — заявіў Аляксандр Лукашэнка 29 жніўня ў Мінску, заслухаўшы даклад аб “актуальных пытаннях інфармацыйнай палітыкі”.

“Дрэнна становіцца ад таго, што я чытаю — гэтыя агляды сусветных сродкаў масавай інфармацыі: “Ды Лукашэнка тое, ды ён гэта…”. Ды ён заўтра аддасьць загад — пойдуць туды”, — сказаў ён.

“Мы толькі тады будзем ваяваць, калі прыйдуць да нас з дрэннымі намерамі. Вось і ўсё”, — заявіў Лукашэнка.

29 жніўня Мінабароны паведаміла, што ў рамках задач па “ўзмацненні дзяржаўнай мяжы на паўднёвых рубяжах” у адным з раёнаў “разгорнуты медыцынскі атрад спецыяльнага прызначэння”.

“Ваенныя ўрачы медыцынскага атрада спецыяльнага прызначэння 432-га Галоўнага ваеннага клінічнага медыцынскага цэнтра Узброеных сіл пры неабходнасці гатовыя ў любы момант аказаць байцам кваліфікаваную дапамогу. Асабісты склад МАСН мае шматгадовы досвед працы, браў удзел і ў міжнародных гуманітарных місіях, у тым ліку на тэрыторыі Сірыі і Лівана”, — заявіла Мінабароны.

Тэрмінам “Спецыяльная вайсковая аперацыя (СВА)” расійскія і беларускія ўлады называюць поўнамаштабную вайну, якая вядзецца РФ супраць Украіны пры падтрымцы афіцыйнага Мінска з 24 лютага 2022 года.

З 2023 года “вопыт СВА” рэгулярна фігуруе ў рэлізах сілавых ведамстваў аб правядзенні ў Беларусі розных вучэнняў.

38-я асобная гвардзейская дэсантна-штурмавая Брэсцкая Венская Чырванасцяжная брыгада — асобнае злучэнне ў складзе сіл спецыяльных аперацый УС Беларусі.

Прыцягвалася для падаўлення масавых пратэстаў у 2020 годзе.

У 1999–2002 гадах камандзірам брыгады быў Валерый Сахашчык, да 1 жніўня 2024 года — прадстаўнік Аб’яднанага пераходнага кабінета па абароне і нацыянальнай абароне.