Праваабаронцам вядомыя імёны сямі вызваленых па апошнім указе аб памілаванні
5 верасня, Позірк. Беларускім праваабаронцам вядомыя імёны 7 з 30 вызваленых у адпаведнасці з указам Аляксандра Лукашэнкі ад 4 верасня палітвязняў, паведамляе праваабарончы цэнтр “Вясна”.
Аднак яны, як і ранней, “падтрымліваюць інфармацыйную цішыню” дзеля забеспячэння іх бяспекі.
Са спасылкай на інфармацыю незалежных СМІ “Вясна” адзначае, што сярод вызваленых супрацоўніца ІТ-кампаніі EPAM Дзіяна Завадская, прадпрымальніца, танцорка і жонка вакаліста музычнага гурта “Бан Жвірба” Вікторыя Гаўрыліна і актывістка руху “Маці 328” у абарону дзяцей, асуджаных па “антынаркатычным” арт. 328 Крымінальнага кодэкса Марына Кісялевіч (аб іх выхадзе на свабоду раней пісаў “Позірк”).
7 жанчын і 23 мужчыны, “асуджаныя за злачынствы пратэстнай накіраванасці”, памілаваныя ў адпаведнасці з указам № 343, паведаміла напярэдадні прэс-служба Лукашэнкі. Большасць з іх — бацькі непаўналетніх і малалетніх дзяцей.
Памілаваныя былі пазбаўленыя волі за каментары ў інтэрнэце, вынікае са слоў генеральнага пракурора Андрэя Шведа.
16 жніўня Лукашэнка падпісаў указ аб памілаванні 30 асоб, асуджаных за злачынствы “пратэстнай накіраванасці”.
У ліку памілаваных 14 жанчын і 16 мужчын, “некаторыя з іх маюць сур’ёзныя захворванні”, “ёсць асобы пенсійнага ўзросту”, гаварылася ў паведамленні прэс-службы Лукашэнкі.
Праваабаронцам было вядома пра 25 палітвязняў, якія выйшлі на волю па памілаванні ў рамках жнівеньскага ўказа. Названыя імёны 15 з іх: Ксенія Луцкіна, Ірына Санкоўская, Васіль Бераснеў, Наталля Пятровіч, Вольга Новікава, Ала Зуева, Вольга Страбоўская, Кацярына Леў, Тамара Каравай, Святлана Палуэктова, Яўген Чуміла, Павел Кучынскі, Руслан Красаў, Аляксандр Галуза, Алег Зыкун.
На пачатку ліпеня праваабаронцы паведамлялі пра выхад 18 палітвязняў, якое адбылося пасля заявы Лукашэнкі аб вызваленні яго “вельмі цяжкахворых” апанентаў.
Старшыня Вярхоўнага суда Валянцін Сукала паведаміў, што пасля згаданай заявы было вызвалена 14 чалавек. Сярод іх анкахворы Рыгор Кастусёў, а таксама Дар’я Лосік, Тамара Астрэйка, Святлана Лупач, Кацярына Мадзянкова і Паліна Палавінка.
Паводле інфармацыі праваабаронцаў, у цяперашні час палітвязнямі ў Беларусі прызнана 1.373 чалавекі. У рэальнасці іх значна больш.