Аналітык: Віктарын — ідэальны чалавек для пошуку кампрамісаў паміж Беларуссю і ЕС
6 верасня, Позірк. Прызначэнне Андрэа Віктарын на пасаду кіраўніка амбасады ФРГ у Мінску “цікавае ва ўсіх адносінах”. Такое меркаванне ў каментары “Позірку” выказаў палітычны аналітык Аляксандр Фрыдман, які жыве ў Германіі.
“Па-першае, мяркуючы па ўзросце (дыпламат нарадзілася ў 1957 годзе. — “Позірк”.), гэта — завяршальны этап яе кар’еры, і вельмі сімвалічна, што яна яго правядзе ў Беларусі — краіне, дзе ўжо неаднаразова працавала”, — адзначыў Фрыдман.
“Па-другое, — працягнуў аналітык, — яна сапраўды разбіраецца ў постсавецкай прасторы. Як я разумею, у яе быў вельмі паспяховы досвед працы ў Арменіі, а гэта таксама вельмі няпросты ўчастак, і, мяркуючы па ўсім, стасункі паміж ЕС і Арменіяй падчас яе знаходжання там паляпшаліся і паглыбляліся”.
“І, вядома, яе праца ў Беларусі ў другой палове 2010-х таксама важная, таму што яна знаёмая з вельмі многімі з тых, хто цяпер так ці інакш прымае рашэнні ў Беларусі. У гэтым сэнсе ёй працаваць у Беларусі будзе больш зразумела і прасцей”, — выказаў меркаванне Фрыдман
“У тым ліку, — дадаў ён, — калі будуць нейкія кантакты, пошук кампрамісаў паміж Беларуссю і Германіяй, Беларуссю і ЕС, то яна — ідэальны чалавек, прыдатны для гэтага”.
