Беларусь будзе “настолькі актыўная ў стасунках” з В’етнамам, наколькі дазволіць сабе яго кіраўніцтва — Лукашэнка

9 верасня, Позірк. Беларусь усё гэтак жа “адданая развіццю супрацы з В’етнамам”, заявіў Аляксандр Лукашэнка 9 верасня ў Мінску на сустрэчы з міністрам грамадскай бяспекі (МГБ) гэтай краіны Лыонг Там Куангам.

“Усё залежыць ад в’етнамскага боку. Мы будзем настолькі актыўныя ў нашых стасунках, наколькі гэта можа сабе дазволіць в’етнамскае кіраўніцтва”, — цытуе Лукашэнку яго прэс-служба.

На яго думку, у Мінска і Ханоя ў міжнародных стасунках “погляды падобныя”: “Мы за шматпалярны свет. І хочам мы гэтага ці не, шматпалярны свет надыйдзе. У сувязі з гэтым у свеце, які моцна змяняецца, вельмі складаным, неадназначным свеце пытанні бяспекі выходзяць на першае месца. Я вельмі спадзяюся, што ваш візіт у Беларусь будзе садзейнічаць умацаванню нашых стасункаў і ў сферы бяспекі”.

В’етнамскі чыноўнік у сваю чаргу, як сцвярджаецца, заявіў, што візіт дэлегацыі МГБ у Беларусь “будзе садзейнічаць паглыбленню дружалюбных стасункаў не толькі паміж дзвюма краінамі, але таксама і паміж іх сілавымі структурамі”. “Гэты візіт вельмі значны. Думаю, што ён стане добрым стымулам для развіцця стасункаў паміж ведамствамі Беларусі і В’етнама”, — прыводзіць словы Лыонг Там Куанга прэс-служба прымаючага боку.

Дыпламатычныя стасункі паміж Беларуссю і В’етнамам ўсталяваныя 24 студзеня 1992 года. Беларускае гандлёвае прадстаўніцтва ў Ханоі было пераўтворана ў амбасаду ў снежні 1997 года, в’етнамская дыпмісія ў Мінску адкрылася напрыканцы 2003-га.

У снежні 2023 года ў Хашыміне адкрыта генеральнае консульства Беларусі.

Паводле даных МЗС, тавараабарот Беларусі і В’етнама ў 2021 годзе склаў 200,3 млн долараў (беларускі экспарт — 92,9 млн, в’етнамскія пастаўкі — 107,4 млн, адмоўнае сальда — 14,5 млн). Актуальных звестак у адкрытым доступе няма.

Варта адзначыць, што тэзіс пра гатоўнасць супрацоўнічаць так актыўна, як толькі можа партнёр, Лукашэнка паўтараў не раз. Напрыклад, падчас уручэння даверчых грамат 15 лютага ён сказаў прадстаўніку Японіі, якая прыняла санкцыі супраць Беларусі, што гатовы “рухацца па шляху супрацы настолькі хутка і далёка, наколькі да гэтага гатовыя <…> японскія партнёры”.