Ціханоўская абмеркавала з Мелоні вызваленне палітвязняў і еўрапейскую бяспеку

13 лістапада, Позірк. Вызваленне беларускіх палітвязняў і будучыню еўрапейскай бяспекі абмеркавала на палях саміту Еўрапейскай палітычнай супольнасці ў Дубліне 12 лістапада Святлана Ціханоўская з прэм’ер-міністрам Італіі Джорджай Мелоні, паведаміла прэс-служба дэмлідара.

Ціханоўская падзякавала Італіі за падтрымку свабоднай Беларусі і Украіны, а таксама за абарону еўрапейскіх інтарэсаў і каштоўнасцяў. Дэмлідар адзначыла, што беларусы — таксама еўрапейцы і вельмі шануюць падтрымку Італіі. 

“Нас звязваюць не толькі агульныя каштоўнасці, але і супольная будучыня. У Італіі жыве шмат беларусаў, дзейнічае актыўная дыяспара, адкрыты беларускі цэнтр. На працягу дзесяцігоддзяў італьянскія сем’і прымалі беларускіх дзяцей на аздараўленне. І сёння Італія працягвае падтрымліваць нашу барацьбу за свабоду. Мы гэтага не забываем”, — адзначыла Ціханоўская.

Асобнай тэмай размовы стала вайна ва Украіне. Ціханоўская зноў падкрэсліла, што мір павінен быць справядлівым і трывалым, нельга дапусціць новага падзелу Еўропы на сферы ўплыву, пры якім Беларусь застанецца пад кантролем Расіі.

Паводле Ціханоўскай, Еўропа павінна выстаўляць ясныя ўмовы і цвёрда адстойваць свае прынцыпы, а Беларусь не павінна стаць разменнай манетай у перамовах. “Без незалежнай Беларусі не будзе трывалага міру і бяспекі ў нашым рэгіёне”, — у чарговы раз падкрэсліла палітык.

Ціханоўская адзначыла важнасць амерыканскіх намаганняў па вызваленні палітвязняў і заклікала падтрымліваць гэты працэс. Адначасова яна падкрэсліла, што вызвалення асобных людзей недастаткова — неабходна дамагчыся вызвалення ўсіх палітвязняў і спынення рэпрэсій.

Дэмлідар наведвала Рым у сакавіку. Падчас сустрэчы з Мелоні бакі абмеркавалі “бягучую сітуацыю ў Беларусі, у тым ліку працяг рэпрэсій, а таксама рост залежнасці рэжыму Лукашэнкі ад Расіі”.

Раней Ціханоўская сустракалася з Мелоні ў Рыме ў ліпені 2023 года. Абмяркоўвалася абарона беларускай незалежнасці і ізаляцыя рэжыму Лукашэнкі.