Большасць выбаршчыкаў у амбасадзе Малдовы ў Мінску прагаласавала за ўступленне ў ЕС

28 кастрычніка, Позірк. Большасць выбаршчыкаў на ўчастку ў амбасадзе Малдовы ў Мінску прагаласавала за ўнясенне ў Канстытуцыю палажэння аб інтэграцыі краіны ў Еўрапейскі саюз.

Галасаванне адбылося 20 кастрычніка, пратаколы з выбарчых участкаў, у тым ліку замежных, былі апублікаваныя пазней.

У падтрымку ўступлення Малдовы ў ЕС выказалася 110 з 203 (54,2%) грамадзян краіны, якія знаходзіліся ў Беларусі і чые бюлетэні былі прызнаныя сапраўднымі, супраць — 93 (45,8%). Усяго ў галасаванні ўдзельнічала 205 чалавек. У амбасаду было завезена 2.000 бюлетэняў.

Агулам грамадзяне Малдовы выказаліся за ўключэнне ў Асноўны закон пункта аб інтэграцыі краіны ў ЕС як стратэгічнай мэты (50,38%).

Адначасова адбыўся першы тур прэзідэнцкіх выбараў. Цяперашні кіраўнік дзяржавы, прыхільніца еўраінтэграцыі Мая Санду (беспартыйная) на ўчастку ў Мінску атрымала адносную большасць галасоў — 42,86% (87 з 203). На другім месцы Аляксандр Стаяногла (вылучаны Партыяй сацыялістаў) — 32,02% (65 галасоў). Гэтыя ж кандыдаты выйшлі ў другі тур (адбудзецца 3 лістапада) па выніках падліку ўсіх галасоў, набраўшы адпаведна 42,49% і 25,95%.

Гл. таксама:

У Мінску на ўчастку па выбарах у грузінскі парламент з невялікім адрывам перамагла кіруючая партыя