У Хойніцкім раёне не будуць уводзіць дадатковыя меры бяспекі ў сувязі з палётамі расійскіх БПЛА

10 лістапада, Позірк. У Хойніцкім раёне не будуць уводзіцца дадатковыя меры бяспекі ў сувязі з рэгулярнымі палётамі расійскіх беспілотных лятальных апаратаў, вынікае з адказу Гомельскага абласнога выканаўчага камітэта на адпаведны зварот грамадзян.

Дакумент за подпісам начальніка галоўнага ўпраўлення адукацыі Руслана Смірнова апублікаваны на партале petitions.by.

“Меры па забеспячэнні бяспекі дзяцей ва ўстановах адукацыі Хойніцкага раёна арганізаваныя ў адпаведнасці з правіламі бяспекі, зацверджанымі пастановай Міністэрства адукацыі Рэспублікі Беларусь № 227 ад 03.08.2022”, — гаворыцца ў адказе рэгіянальных уладаў.

Пра зварот мясцовых жыхароў да ўладаў з просьбай абараніць ад “шахедаў” паведамлялася 20 кастрычніка. Хадайніцтва аб узмацненні мер бяспекі было патлумачана “частымі пралётамі беспілотных лятальных апаратаў над тэрыторыяй Гомельскай вобласці”.

У звароце гаварылася, што засцерагчы ад БПЛА неабходна “ў першую чаргу дзяцей, якія наведваюць дзіцячыя сады і школы”.

“У пачатку верасня 2024 года ў Гомелі адбылося падзенне збітага БПЛА, што прывяло да пашкоджання будынка на ўскраіне горада. Хоць пацярпелых не было, гэта падкрэслівае патэнцыйную небяспеку падобных здарэнняў для грамадзянскіх аб’ектаў”, — адзначалася ў петыцыі.

Падкрэслівалася, што раней Міністэрства абароны “зафіксавала некалькі выпадкаў парушэння паветранай прасторы краіны з боку замежных беспілотнікаў, што стварае дадатковую пагрозу для памежных раёнаў, такіх як Хойніцкі”.

“У сітуацыі, якая склалася, мы асабліва перажываем за нашых дзяцей”, — заяўлялі аўтары.

“У нашым раёне дзейнічае каля двух дзясяткаў дашкольных і сярэдніх навучальных устаноў. Кожны дзень, адпраўляючы туды дзяцей, мы не знаходзім сабе месца. Лічым, што органы ўлады і войска абавязаныя забяспечыць дзейсную абарону сваіх грамадзян усімі магчымымі сродкамі”, — задзначалася ў звароце.

Жыхары раёна, які мяжуе з Украінай, “настойліва” папрасілі “абсталяваць навучальныя ўстановы <…> сродкамі радыёэлектроннай барацьбы (РЭБ)”, прапанаваўшы ўсталяваць іх “на дахах адукацыйных устаноў”.

У звароце не ўказвалася дзяржаўная прыналежнасць БПЛА, якія лётаюць над Беларуссю, аднак яны названыя “шахедамі” — па марцы іранскага вытворцы беспілотнікаў, якія пастаўляюцца для патрэб расійскай арміі.

Паведамлялася, што петыцыя была накіраваная ў Гомельскі абласны выканаўчы камітэт. Паводле атрыманага ад уладаў адказу, зварот цяпер знаходзіцца на разглядзе ў галоўным упраўленні адукацыі аблвыканкама.

10 лістапада Узброеныя сілы Украіны паведамілі пра чарговыя ўварванні ў паветраную прастору Беларусі расійскіх БПЛА. Паводле звестак маніторынгавай групы “Беларускі Гаюн”, у ноч на 10 лістапада ў Гомельскую вобласць заляцела не менш за 10 беспілотнікаў, тры з іх “зніклі” ў Брагінскім, Мазырскім і Ельскім раёнах.

Раней УСУ паведамлялі аб залётах на беларускую тэрыторыю расійскіх дронаў у ноч на 17, 18, 20, 22, 26, 27, 28 кастрычніка, 1 і 3 лістапада.

4 кастрычніка Аляксандр Лукашэнка прызнаў факты парушэння мяжы баявымі беспілотнікамі і заявіў, што беларускі бок шмат збівае незалежна ад таго, украінскія яны ці расійскія.

Залёт БПЛА Лукашэнка патлумачыў недасведчанасцю тых, хто іх выкарыстоўвае, і адзначыў, што пасля ўздзеяння сродкаў радыёэлектроннай барацьбы беспілотнікі губляюць арыенцір.

“Некалькі выпадкаў такіх было і з боку Расіі, і з боку Украіны”, — сказаў ён падчас паездкі ў Пінскі раён (Брэсцкая вобласць).

Паводле яго слоў, гэтыя пытанні ў Беларусі вырашаюць “на ўзроўні адмыслоўцаў, не выносячы ў публічнае поле”. Такія дамоўленасці нібы былі дасягнутыя з абодвума бакамі.

У ноч на 3 кастрычніка з’явілася інфармацыя пра ўварванне чарговага расійскага беспілотніка. Тады было выказана меркаванне, што дрон іранскай маркі “Шахед” мог упасці ў Калінкавічах (Гомельская вобласць). Беларускія ўлады інцыдэнт ніяк не каментавалі.

Разам з тым 4 кастрычніка супрацоўнікі КДБ “пры сілавой падтрымцы вайскоўцаў САХРу” затрымалі жыхарку Калінкавічаў. Яны ўварваліся ў дом, відэакамера на якім зафіксавала шум і водбліскі падаючага беспілотніка.

З ліпеня гэтага года рэсурсы, якія спецыялізуюцца на маніторынгу ваеннай сітуацыі, паведамлялі пра мноства выпадкаў уварвання ў паветраную прастору Беларусі беспілотнікаў, якімі Расія атакуе Украіну.

У ноч на 5 верасня некалькі дронаў былі збітыя над Гомелем, рэшткі аднаго з іх упалі на будынак склада, ніхто не пацярпеў. Мінабароны было вымушана прызнаць факт парушэння мяжы лятучымі аб’ектамі, але не назвала, каму яны належылі.

8 верасня Міністэрства абароны Латвіі паведаміла, што ў Рэзекненскім краі (не з’яўляецца прыгранічным, месціцца прыкладна за 35 км ад мяжы з Беларуссю) разбіўся расійскі дрон. 9 верасня кіраўніцтва латвійскіх Нацыянальных узброеных сіл заявіла, што расійскі дрон, які пацярпеў крушэнне ў Гайгалаўскай воласці Рэзекненскага краю, быў “начыненым выбухоўкай беспілотнікам тыпу Shahed”.