13 лістапада, Позірк. Савет Еўропы (СЕ) па дамоўленасці з урадам Літвы стварае ў Вільнюсе інфармацыйны пункт для грамадзян Беларусі.
Адпаведнае пагадненне падпісана 13 лістапада намеснікам генеральнага сакратара СЕ Б’ёрнам Берге і міністрам замежных спраў Літвы Габрыэлюсам Ландсбергісам.
“Гэта важны ўклад у нашу падтрымку беларускіх дэмакратычных сіл і грамадзянскай супольнасці. Інфармацыйны пункт будзе не толькі прадастаўляць інфармацыю аб Савеце Еўропы і яго працы. Гэта знак надзеі для ўсіх, хто імкнецца да дэмакратычных каштоўнасцяў”, — цытуе прэс-служба генеральнага сакратара СЕ Ален Берсе.
Ландсбергіс заявіў, што інфармацыйны пункт для беларусаў “будзе адыгрываць ключавую ролю ў павышэнні дасведчанасці і ўмацаванні патэнцыялу ў галіне правоў чалавека, дэмакратыі і вяршэнства закона для пабудовы будучай дэмакратычнай і квітнеючай Беларусі”.
Адзначаецца, што інфапункт будзе інфармаваць беларусаў аб працы, каштоўнасцях і прынцыпах Савета Еўропы, а таксама падтрымліваць мерапрыемствы, якія праводзяцца ў Літве па ўзгадненні з кантактнай групай СЕ па супрацоўніцтве з дэмакратычнымі сіламі і грамадзянскай супольнасцю.
Аб працы над адкрыццём інфармацыйнага пункта СЕ ў Вільнюсе, што “дапаможа яшчэ больш умацаваць” супрацоўніцтва дэмсіл і арганізацыі, заявіла дэмакратычны лідар Святлана Ціханоўская 19 чэрвеня на сустрэчы з ранейшым генеральным сакратаром Марыяй Пейчынавіч-Бурыч (пакінула пасаду 25 чэрвеня).
25 чэрвеня падчас выступу перад Парламенцкай асамблеяй Савета Еўропы (ПАСЕ) у Страсбургу Ландсбергіс заявіў, што ўлады Літвы “будуць рады” размясціць у Вільнюсе “інфармацыйны пункт Савета Еўропы па Беларусі”.
Рашэнне аб стварэнні кантактнай групы СЕ па Беларусі было прынята ў верасні 2022 года. Першае пасяджэнне адбылося ў лістападзе таго ж года. З беларускага боку ў групу ўвайшлі прадстаўнікі дэмакратычных сіл і грамадзянскай супольнасці.
Ад Савета Еўропы ў групе ўдзельнічаюць прадстаўнікі ўсіх палітычных структур, у тым ліку ПАСЕ і Офісу камісара па правах чалавека.
У кастрычніку мінулага года Савет Еўропы прадаставіў дэмсілам асобны офіс у сваім будынку ў Страсбургу.
Праект новага двухгадовага плана работы групы быў падрыхтаваны ў снежні мінулага года.
