Лукашэнка хоча ў наступныя пяць гадоў “адшліфаваць краіну”, каб “перадаць дзецям” у ідэальным стане
16 лістапада, Позірк. “У наступныя пяць гадоў адшліфуем краіну і прывядзем яе ў ідэальны стан, каб перадаць нашым дзецям”, — заявіў Аляксандр Лукашэнка 16 лістапада ў Клімавічах (Магілёўская вобласць) на абласным свяце “Дажынкі”.
Паводле яго слоў, “будзе эканоміка — вайны ніколі не будзе”. “Не будзе эканомікі — самі спарадзім гэтую вайну, грамадзянскую развяжам”, — цытуе Лукашэнку яго прэс-служба.
“А ахвочых хапае: яны за мяжой ходзяць, бразгаюць зброяй, — дадаў ён. — Але баяцца, таму што з’яднаныя мы як ніколі, таму што мы жыць хочам на сваёй зямлі. Яны гэтага баяцца найперш, а не таму, што бацька там з дубінай ходзіць. Яны баяцца нашага адзінства і таго, што мы жадаем працаваць. Страцім гэтае пачуццё — паглядзіце, што будзе. Не дай бог гэтага дапусціць”.
Спікер сцвярджае, што ў наступныя пяць гадоў улады плануюць пабудаваць “ультрасучасныя свінакомплексы і канчаткова разабрацца з перапрацоўкай лёну”.
“Лён — гэта будучыня. Не таму, што гэта сімвал нашай краіны і ў нашым гербе лён, — сказаў ён. — Вы бачыце — кошты пачалі расці. Людзі ўсё больш і больш да натуральных тканін схіляюцца. Акрамя беларусаў. Беларусы не разумеюць. Беларусы рвуцца за Gucci, Versace і іншай брыдотай. Сваё трэба насіць. Свае тканіны. Мы маем усё. Насіце сваё і прывучайце дзяцей да гэтага”.
Беларусь, заявіў Лукашэнка, важна забяспечыць уласнай гароднінай, садавінай і рыбай “па даступных цэнах”, укараніць новыя культуры — сою, тэхнічную каноплю, а таксама “самабытныя і новыя прадукты, якія пачалі вырошчваць у краіне ў сувязі з пацяпленнем”.
“Усе мы можам, і Гасподзь падарыў нам дзіўную прыроду для таго, каб жыць нармальна і працаваць, — сказаў ён. — Наша задача — экспарт у аб’ёме не менш як 10 мільярдаў долараў за год з акцэнтам на новыя рынкі, а новыя рынкі — гэта Азія і Афрыка”.
“Вы не думайце, што нам Захад санкцыі ўвёў, бо ў нас правоў чалавека няма ды іншае. Пра гэта ўжо ўсё забыліся. Мы для іх канкурэнты. Нашая прадукцыя там не патрэбная. Быццам ваююць [разам] з Украінай — дапамагаюць ды іншае. Але як толькі ўкраінцы праз Польшчу і іншыя краіны пачалі вывозіць збожжа, у тую ж Афрыку, не ім, яны закрылі гэтыя дарогі. Чаму? Гэта ж сябры, абяцалі дапамагчы. А таму што збожжа — гэта канкурэнт для Заходняй Еўропы”, — дадаў спікер.
Беларусь “патрэбная краінам Афрыкі і Азіі”, заявіў Лукашэнка, прывёўшы ў прыклад Зімбабвэ, Кітай і згадаўшы Расію.
“8–9 мільярдаў долараў сёлета мы можам атрымаць ад экспарту, — сцвярджае ён. — Нафтавікі столькі не атрымліваюць. А трэба 10 мільярдаў — адзін мільярд застаўся. Мы павінны ў наступнай пяцігодцы падысці да гэтага ўзроўню. Будзе нялёгка. Але зразумейце, інакш дабіцца выніку будзе немагчыма. Толькі цяжкая праца, пот і максімальная напруга могуць нам дапамагчы”.
“Разарваць і прыхапіць Беларусь ахвочых шмат. Як толькі паслабімся і самазаспакоімся — знікнем з палітычнай і геаграфічнай мапы свету”, — сказаў спікер.
На падставе прыведзеных прэс-службай Лукашэнкі фрагментаў спічу можна зрабіць выснову, што ён не сумняваецца ў працягу свайго праўлення. Працэс падрыхтоўкі да прэзідэнцкіх выбараў, прызначаных на 26 студзеня 2025 года, праходзіць пад кантролем уладаў, палітычнае поле краіны зачышчанае ад актыўных апанентаў Лукашэнкі. Прадстаўнікі беларускіх дэмакратычных сіл за мяжой называюць тое, што адбываецца, “спецаперацыяй па ўтрыманні ўлады”, праваабаронцы звяртаюць увагу на імітацыю канкурэнцыі.