Беларусь заняла шостае месца на тэрыторыі былога СССР па росце спажывецкіх цэн у студзені — кастрычніку 2024 года
24 лістапада, Позірк. Беларусь з паказчыкам 4,27% заняла шостае месца па росце спажывецкіх цэн у студзені — кастрычніку 2024 года на тэрыторыі былога СССР, сведчыць праведзены “Позіркам” аналіз звестак нацыянальных органаў статыстыкі.
Паводле вынікаў студзеня яна была шостай (0,79%), студзеня — лютага і першага квартала — другой (1,74% і 2,22%), студзеня — красавіка — пятай (2,66%), студзеня — траўня — сёмай (2,77%), першага паўгоддзя — шостай (3,39%), студзеня — ліпеня і студзеня — жніўня — сёмай (3,42% і 3,35%), студзеня — верасня — шостай (3,80%).
Наперадзе па інфляцыі за 10 месяцаў Украіна (+8,4%), Узбекістан (+7,67%), Казахстан (+6,6%), Расія (+6,57%) і Малдова (+5,55%).
За Беларуссю — Кыргызстан (+4,2%), Эстонія (таксама +4,2%), Таджыкістан (+3,2%), Азербайджан (+3,1%), Латвія (+2,8%), Літва (+1,2%) і Грузія (+0,5%).
У Арменіі кошты знізіліся на 0,8%.
Туркменістан шэсць гадоў не публікуе звесткі пра інфляцыю.