На выбарчую кампанію Лукашэнкі сабрана ў 21 раз больш грошай, чым на ўсіх астатніх прэтэндэнтаў

30 лістапада, Позірк. У выбарчы фонд Аляксандра Лукашэнкі, які вылучаецца кандыдатам у якасці кандыдата ў прэзідэнты, да 27 лістапада паступіла 610.120 рублёў, сведчыць апублікаваная Цэнтральнай выбарчай камісіі прамежкавая справаздача.

Праведзены “Позіркам” аналіз даных ЦВК сведчыць, што за тыдзень сума сродкаў у яго фондзе павялічылася на 9,5% (на 20 лістапада было 557.430), за два тыдні — на 42,8% (на 13 лістапада — 427.240).

Да 13 лістапада на выбарчую кампанію Лукашэнкі выдаткавалі 13.221 рубель, да 20 лістапада сума выдаткаў павялічылася да 91.333,74 і з таго часу не расла.

Варта адзначыць, што на патрэбы Лукашэнкі сабрана ў 20,7 раза больш, чым на астатніх чатырох прэтэндэнтаў на прэзідэнцкае крэсла (у іх агулам 29.440 рублёў).

У фонд былога члена Аб’яднанай грамадзянскай партыі, дэпутата Палаты прадстаўнікоў у 2016–2019 гадах, кандыдата на пасаду прэзідэнта ў 2020 годзе Ганны Канапацкай ахвяравана 12.300 рублёў (на 20 лістапада — 9.200, рост на 33,7%; на 13 лістапада не было ні капейкі).

На кампанію старшыні Камуністычнай партыі Беларусі Сяргея Сыранкова сабрана 11.955 рублёў (4.900, рост у 2,4 разы; два тыдні таму фонд быў пусты).

Кіраўнік лаяльнай дзейным уладам Ліберальна-дэмакратычнай партыі Алег Гайдукевіч прыцягнуў ахвяраванні на суму 3.035 рублёў (13 і 20 лістапада на рахунку было 200 рублёў, рост у 15,1 раза).

Самая сціплая сума — 2.150 рублёў — паступіла ў фонд кіраўніка праўладнай Рэспубліканскай партыі працы і справядлівасці Аляксандра Хіжняка (200, рост у 10,8 раза; на 13 лістапада рахунак пуставаў).

Хіжняк і Сыранкоў нічога не змарнавалі на выбарчую кампанію, Гайдукевіч выдаткаваў 140,88 рубля, Канапацкая — 8.000.

Збор подпісаў за вылучэнне кандыдатаў на пасаду прэзідэнта працягнецца па 6 снежня.

Згодна з Выбарчым кодэксам, для ўдзелу ў выбарах прэтэндэнту на прэзідэнцкае крэсла неабходна сабраць не менш як 100 тыс. подпісаў. Ініцыятыўная група Лукашэнкі 21 лістапада заявіла, што за яго вылучэнне сабрана сама меней 1,581 млн подпісаў, на наступны дзень Гайдукевіч адсправаздачыўся аб пераадоленні мінімальнага парога і выказаў намер працягнуць збор.

Канапацкая 22 лістапада заявіла, што яе ініцыятыўная група збірае па 4 тыс. подпісаў штодня, але агульную колькасць не назвала. Хіжняк і Сыранкоў сваімі поспехамі публічна не дзяліліся.

Працэс падрыхтоўкі да сёмых прэзідэнцкіх выбараў, прызначаных на 26 студзеня 2025 года, праходзіць пад кантролем уладаў, палітычнае поле краіны зачышчанае ад актыўных апанентаў Лукашэнкі. Прадстаўнікі беларускіх дэмакратычных сіл за мяжой называюць тое, што адбываецца, “спецаперацыяй па ўтрыманні ўлады”, праваабаронцы звяртаюць увагу на імітацыю канкурэнцыі.

З 1996 года ніводная выбарчая кампанія ў Беларусі не была прызнаная незалежнымі назіральнікамі транспарэнтнай і адпаведнай дэмакратычным стандартам.

Даведка “Позірку” (на падставе даных ЦВК):

На прэзідэнцкіх выбарах 2020 года больш за ўсё сродкаў паступіла ў фонд Святланы Ціханоўскай — 272.362,28 рубля (выдаткавана 217.055,63 рубля, або 79,7%). На другім месцы быў Лукашэнка — 258.712,87 (242.978,03, або 93,9%), далей Андрэй Дзмітрыеў — 6.447,60 (5.481,46, або 85%), Канапацкая — 4.357 (4.163,18, або 95,6%) і Сяргей Чэрачань — 3.300 (3.149,58, або 95,4%).