МАРГ аштрафаваў мабільнага аператара А1 амаль на 110 млн рублёў
29 верасня, Позірк. Аб прыцягненні да адміністрацыйнай адказнасці мабільнага аператара А1 (раней Velcom) у выглядзе штрафу за парушэнне антыманапольнага заканадаўства паведаміла прэс-служба Міністэрства антыманапольнага рэгулявання і гандлю (МАРГ).
Ведамства адзначае, што ў красавіку рашэннем камісіі МАРГ у дзеяннях А1 было ўстаноўлена парушэнне антыманапольнага заканадаўства, “якое выявілася ў закрыцці з 1 чэрвеня 2025 года архіўных тарыфных планаў “Без ліміту” і “Без ліміту 2.0” і пераводзе абанентаў на дзейны тарыфны план “Драйв анлім” з больш высокім коштам”.
У чэрвені паведамлялася, што Вярхоўны суд пагадзіўся з рашэннем МАРГ. Судовая калегія па эканамічных справах ВС падтрымала высновы аб злоўжыванні кампаніяй дамінантным становішчам і адмовіла А1 ў задавальненні заявы, у якой яны аспрэчваліся.
Як паведамляе МАРГ, згодна з пастановай Эканамічнага суда Мінска кампанія прыцягнутая да адміністрацыйнай адказнасці ў выглядзе штрафу сумай 109,7 млн рублёў, а службовая асоба прадпрыемства (не называецца) — 2.250.
Рашэнне суда не набыло моцы і можа быць абскарджанае.
31 снежня 2025 года МАРГ паведаміў аб падпісанні пагаднення з аператарамі А1 і МТС аб непадвышэнні тарыфаў на мабільную сувязь у 2026 годзе. Гэтыя аператары працягнулі адпаведнае абавязацельства, тэрмін дзеяння якога мінаў 31 снежня.
29 траўня 2024 года паведамлялася, што эканамічны суд Мінска аштрафаваў А1 за завышаныя цэны на паслугі мабільнай сувязі.
З лістапада 2007 года беларускім аператарам Velcom (перайменаванне на А1 адбылося ў 2019 годзе) валодае аўстрыйская кампанія Telekom Austria Group, адзін з вядучых тэлекамунікацыйных правайдараў у Цэнтральнай і Усходняй Еўропе.
