МАРГ адмовіла аператару А1 у пераглядзе рашэння па антыманапольнай справе
20 кастрычніка, Позірк. Міністэрства антыманапольнага рэгулявання і гандлю (МАРГ) Беларусі адмовіла ўнітарнаму прадпрыемству “А1” у задавальненні хадайніцтва аб пераглядзе рашэння “па наноў адкрытых абставінах”, паведаміла 20 кастрычніка прэс-служба ведамства.
Падрабязнасці справы не прыводзяцца. Разам з тым раней паведамлялася пра буйную антыманапольную справу, звязаную з А1.
У чэрвені 2025 года мабільны аператар закрыў архіўныя тарыфныя планы “Без Ліміту” і “Без Ліміту 2.0”, перавёўшы абанентаў на даражэйшы план “Драйв Анлім”. Сітуацыя выклікала абурэнне ў грамадстве, у справу ўмяшалася МАРГ.
У красавіку 2026-га камісія МАРГ прыйшла да высновы, што кампанія А1 злоўжыла сваім становішчам дамінанта на рынку, парушыўшы антыманапольнае заканадаўства. Праз некалькі месяцаў, у чэрвені, стала вядома, што мабільны аператар спрабаваў аспрэчыць гэтае рашэнне ў Вярхоўным судзе, аднак калегія па эканамічных справах ВС падтрымала міністэрства. Напрыканцы верасня з’явілася інфармацыя, што Эканамічны суд Мінска аштрафаваў А1 на 109,7 млн рублёў.
Згодна з апошнім паведамленнем МАРГ, за студзень — верасень 2026 года па выніках антыманапольных расследаванняў складзена і накіравана ў суд 37 пратаколаў аб адміністрацыйных правапарушэннях. Агульная сума штрафных санкцый на іх падставе перавышае 110,5 млн рублёў.
Такім чынам, калі вынесены А1 штраф уключаны ў статыстыку, то ўсе астатнія спагнанні складаюць толькі каля 0,7% агульнай сумы.
Паводле інфармацыі міністэрства, за дзевяць месяцаў разгледжана 278 зваротаў у сферы антыманапольнага рэгулявання. З іх 153 тычыліся тлумачэння заканадаўства, 125 — магчымых парушэнняў.
Камісія па вызначэнні факта наяўнасці (адсутнасці) парушэння антыманапольнага заканадаўства разгледзела 73 матэрыялы. Па шасці з іх вызначаныя парушэнні, выдадзена чатыры прадпісанні.
У рамках кантролю за эканамічнай канцэнтрацыяй МАРГ разгледзела 206 заяў, з якіх узгадніла 114. Таксама ведамства атрымала 103 “апавяшчэнні аб ажыццяўленні эканамічнай канцэнтрацыі”.
Для ацэнкі ўзроўню манапалізацыі рынку спецыялісты правялі аналіз канкурэнцыі на 53 таварных рынках. Паводле вынікаў аналізу ў Дзяржаўны рэестр дамінантаў уключылі 128 суб’ектаў, выключылі 89. У Дзяржаўны рэестр суб’ектаў натуральных манаполій уключылі аднаго суб’екта, выключылі двух.
