Дзеянне закона, які легалізуе пірацтва і “шэры” імпарт, падоўжана да канца 2026 года

5 снежня, Позірк. Дзеянне закона, які дэ-юрэ легалізуе пірацтва і “шэры” імпарт, падоўжана да канца 2026 года, вынікае з апублікаванага 5 снежня на Нацыянальным прававым інтэрнэт-партале закона № 42-З ад 2 снежня.

Акрамя павелічэння тэрміна дзеяння нарматыўна-прававы акт уносіць змены ў закон “Аб абмежаванні выключных правоў на аб’екты інтэлектуальнай уласнасці” ад 3 студзеня 2023 года, якія ўдакладняюць асобныя фармулёўкі.

Прыняты каля двух гадоў таму закон дазваляе “ў мэтах стварэння ўмоў для падвышэння ўнутранай устойлівасці эканомікі” ўвозіць у Беларусь і ўводзіць у грамадзянскі абарот тавары, “у якіх прымененыя (утрымліваюцца, уключаныя) аб’екты інтэлектуальнай уласнасці”, без згоды “праваўладальнікаў з замежных дзяржаў, у тым ліку тых, што здзяйсняюць недружалюбныя дзеянні”.

Для гэтага адпаведная прадукцыя павінна быць уключаная ў спецыяльныя пералікі тавараў.

Выкарыстанне ўвезеных такім чынам чужых аб’ектаў інтэлектуальнай уласнасці, з пункту гледжання беларускага заканадаўства, не з’яўляецца парушэннем выключных правоў на гэтыя аб’екты.

У базавым дакуменце гаворка ішла пра камп’ютарныя праграмы, некаторыя аўдыёвізуальныя і музычныя творы, перадачы арганізацый вяшчання.

Увесну 2023 года ўлады вызначылі спіс “недружалюбных” у дачыненні да Беларусі дзяржаў. У ім фігуруюць усе краіны Еўрасаюза, ЗША, Албанія, Вялікабрытанія, Ісландыя, Канада, Ліхтэнштэйн, Нарвегія, Паўночная Македонія, Сербія, Чарнагорыя і Швейцарыя. Гэтыя дзяржавы ўвялі санкцыі супраць рэжыму Аляксандра Лукашэнкі альбо далучыліся да іх.