ЕАБР растлумачыў скарачэнне золатавалютных рэзерваў Беларусі патанненнем золата

9 снежня, Позірк. Ключавым фактарам змяншэння золатавалютных рэзерваў Беларусі ў лістападзе 2024 года стала зніжэнне кошту золата ў выніку скарачэння цэн на 3%, гаворыцца ў штотыднёвым макрааглядзе Еўразійскага банка развіцця (ЕАБР).

Як паведамляў “Позірк”, міжнародныя рэзервовыя актывы Беларусі (ЗВР) на 1 снежня склалі 8 млрд 794,9 млн долараў, зменшыўшыся за месяц на 139 млн (-1,56%).

Паводле папярэдніх даных Нацыянальнага банка, аб’ём ЗВР у манетарным золаце стаў менш на 150,5 млн долараў (4 млрд 594,8 млн), кошт рэзерваў па спецыяльных правах запазычання (СДР) — на 23,2 млн (1 млрд 353,5 млн).

Рэзервовыя актывы ў замежнай валюце павялічыліся на 34,7 млн долараў (2 млрд 846,5 млн).

Рэзервовая пазіцыя ў МВФ і іншыя актывы засталіся ранейшымі — 0,03 млн і 0,1 млн долараў адпаведна.

У студзені золатавалютныя рэзервы Беларусі скараціліся на 33,9 млн долараў (-0,4%), у лютым выраслі на 125,1 млн (+1,5%), у сакавіку — на 133,9 млн (+1,6%), у красавіку — на 89 млн (1,1%), у траўні зменшыліся на 30,1 млн (-0,4%), у чэрвені — на 52,9 млн (-0,6%), у ліпені павялічыліся на 173,5 млн (2,08%), у жніўні — на 165,1 млн (1,94%), у верасні на 161,2 млн (1,85%), у кастрычніку — на 75,6 млн (0,85%).

Згодна з найважнейшымі прагнознымі (дэ-факта планавымі) параметрамі развіцця краіны на 2024 год, міжнародныя рэзервовыя актывы на канец года павінны скласці не менш як 6 млрд долараў, на канец 2025-га — не менш як 7,1 млрд.