За два тыдні ў Беларусь уехала 4.345 грамадзян Украіны — ДПК

13 снежня, Позірк. За мінулыя два тыдні ў Беларусь уехала 4.345 грамадзян Украіны, вынікае са звестак Дзяржаўнага памежнага камітэта (ДПК).

На мінулым тыдні ведамства не паведамляла пра колькасць грамадзян Украіны, якія прыбылі ў краіну.

Непасрэдна праз украінска-беларускую мяжу з 29 лістапада прайшлі чатыры чалавекі, транзітам праз Польшчу — 3.498, Літву — 785, Латвію — 58.

Са студзеня гэтага года ў Беларусь уехала 128.640 грамадзян Украіны: з тэрыторыі Украіны — 66, транзітам праз Польшчу — 102.658, праз Літву — 24.063, праз Латвію — 1.853.

Усяго з 24 лютага 2022 года, калі пачалося поўнамаштабнае ўварванне расійскіх войскаў у суседнюю краіну, з украінскай тэрыторыі прыбыло 275.132 грамадзяніна Украіны: праз украінска-беларускую мяжу — 15.984, транзітам праз Польшчу — 200.446, праз Літву — 52.313, праз Латвію — 6.389.

“Дзяржпагранкамітэт Беларусі займаецца несумленнай падачай лічбаў і чыстай вады маніпуляцыяй”, — заявіў у інтэрв’ю “Позірку” сёлета ў лютым амбасадар па асаблівых даручэннях МЗС Украіны па Беларусі Ігар Кізім.

Дыпламат адзначыў, што ў адкрытых крыніцах звестак пра колькасць украінцаў, якія выехалі з Беларусі, не знайсці.

“На самой справе гаворка ідзе не пра транзітных бежанцаў або людзей, якія ўехалі ў Беларусь, каб папрасіць прытулку. Гэта, як і раней, простыя паездкі ўкраінскіх грамадзян”, — адзначыў Кізім.

Паводле даных ААН на 18 лістапада, у свеце было зафіксавана амаль 6,79 млн украінскіх уцекачоў, з іх амаль 6,226 млн — у Еўропе.