Валавы знешні доўг Беларусі за трэці квартал скараціўся на 0,7%

13 снежня, Позірк. Валавая замежная запазычанасць Беларусі ў трэцім квартале 2024 года знізілася на 244,5 млн долараў (-0,7%) і на 1 верасня склала 36 млрд 402,2 млн долараў (на 1 ліпеня — 36 млрд 646,7 млн), сведчаць даныя Нацыянальнага банка.

На 1 студзеня гэты паказчык складаў 36 млрд 875,4 млн долараў, на 1 красавіка — 36 млрд 376,8 млн.

Запазычанасць сектара дзяржаўнага кіравання склала 16 млрд 934,3 млн долараў (17 млрд 50,2 млн; -0,7%), дэпазітных арганізацый — 4 млрд 860,6 млн долараў (4 млрд 770,2 млн; +1,9%), іншых сектараў — 12 млрд 348,6 млн (12 млрд 595,2 млн; -2%), па прамых інвестыцыях (міжфірменнае крэдытаванне) — 2 млрд 258,7 млн (2 млрд 231 млн; +3,6%).

Валавы знешні доўг Беларусі — нявыплачаная сума абавязацельстваў перад нерэзідэнтамі, якая патрабуе выплаты асноўнага доўгу і (або) працэнтаў.

У адрозненне ад знешняга дзярждоўгу, які ўлічвае толькі абавязацельствы ўрада перад нерэзідэнтамі, валавы знешні доўг ахоплівае абавязацельствы ўсіх рэзідэнтаў, падзеленых на чатыры сектары эканомікі: органы дзяржкіравання, органы грашова-крэдытнага рэгулявання, банкі (дэпазітныя арганізацыі, за выключэннем Нацбанка), іншыя юрыдычныя і фізічныя асобы.

Беларусь на 1 красавіка 2024 года знаходзілася на перадапошнім месцы ў Еўразійскім эканамічным саюзе па паказчыку пакрыцця знешняга доўгу міжнароднымі рэзервамі, вынікае з праведзенага “Позіркам“ аналізу даных Еўразійскай эканамічнай камісіі.

За год Беларусь скараціла свае знешнія абавязанні на 3,4% (да 36 млрд 376,8 млн долараў), Расія — на 15,6% (да 302 млрд 729,1 млн). Доўг вырас у Казахстане — на 0,3% (да 162 млрд 511,8 млн), Арменіі — на 6,4% (да 15 млрд 920 млн), Кыргызстане — на 7,3% (да 10 млрд 561,3 млн).