“Экстрэмісцкай” прызнана старонка ў “Х” украінскай праваабаронцы Мацвійчук, яе цэнтр атрымліваў Нобелеўскую прэмію разам з Бяляцкім

19 снежня, Позірк. Суд Цэнтральнага раёна Мінска прызнаў “экстрэмісцкімі матэрыяламі” кантэнт старонкі ў сацыяльнай сетцы “Х” украінскай праваабаронцы Аляксандры Мацвійчук, вынікае з абноўленага спісу на сайце Міністэрства інфармацыі.

На яе старонку падпісана амаль 200 тыс. чалавек.

З 2007 года Мацвійчук узначальвае ўкраінскі Цэнтр грамадзянскіх свабод (ЦГС), які быў заснаваны ў тым жа годзе з мэтай абароны правоў чалавека і зацвярджэння дэмакратыі ва Украіне.

У 2022 годзе ЦГС стаў лаўрэатам Нобелеўскай прэміі міру. Па рашэнні Нобелеўскага камітэта прэмія тады была падзелена паміж праваабаронцамі: акрамя ўкраінскай арганізацыі, нобелеўскімі лаўрэатамі сталі кіраўнік цэнтра “Вясна” Алесь Бяляцкі (беларускі палітвязень) і расійскае таварыства “Мемарыял”.

У прамове пасля ўручэння прэміі 10 снежня 2022 года Мацвійчук заявіла аб неабходнасці прыцягнення да адказнасці прадстаўнікоў уладаў Беларусі і РФ за вайну супраць Украіны. Яна заклікала стварыць міжнародны трыбунал, каб судзіць Аляксандра Лукашэнку і прэзідэнта РФ Уладзіміра Пуціна.